U·IATTIMGIPAONI
SHILLONG: Meghalaya a·doko Bharatiya Janata Party (BJP)-ni dingtang dingtang office bearer-rangko seokna gita BJP-ni dilgiparang, mikkang antio Jaintia Hills-oni a·bachenge, a·dokni pilak a·jarangonan wenangna sienga.
“Iani bidingo anga pilakonikon agan-ku·pattianirangko ra·kuengani gimin dilgiparangko seokanio somoikode nangkuaigen. Anga dingtang dingtang a·jarangoniko agan-ku·pattianirangko ra·na nangengani gimin mikkang antionin dingtang dingtang a·jarangonaba wenanggen,” ine a·doko BJP-ni gital office bearer-rangko seokani bidingo Meghalaya BJP-ni gital state president Rikman G Momin parakataha.
Uni wenaniko ua Jaintia Hills-oni a·bachengatgen aro uni ja·man, Khasi aro Garo Hills a·jarangonaba ua wenanggen ineba Momin parakataha.
“Anga Meghalaya a·doko BJP-ko bilakbatatna miksongesa ia kamko jako ra·ahani gimin anga Meghalaya a·dokni pilak biaprango donggipa angni nokdangni manderangkoba grongchengna nanggen,” ine ua aganaha.
Dingtang dingtang a·jarangona re·anganio ua manderangni nangnikanirangko ra·chimonggen ineba Momin parakataha.
“Dingtang dingtang a·jarangona wenangani ja·man anga, badia dilgiparang party-na on·kange kamko ka·na man·gen aro sawa mai kamna kraa uko nianggen. Bimingrangko segatenba, ja·mano uko Delhi-ona watatgen,” ine ua aganaha.
Re·baenggipa bilsio ong·atna sienggipa Lok Sabha election-ni gimin sing·on, Meghalaya a·doko BJP dolko je election-naba bilakatsamsoe donna nangenga ine Momin parakataha.
Garo Hills-ni Rikman G Momin-ko adita salrangna skangsan, Ernest Mawrie-ni biapo, Meghalaya a·dokni gital BJP president songskaahachim aro ua October-ni 3 tariko kamtangko jako ra·ahachim ine nikna man·a.
Meghalaya a·doko BJP-ko bilakbatatna gita ua, gitcham president Ernest Mawrie-ko man·chape pilak dilgiparang baksa bakrime kamrangko ka·na gita ku·rachakanikoba on·angahachim.
Meghalaya a·doko BJP-ko ra·chakani gimin janapatskaengon, “A·songni Prime Minister Narendra Modi, kangal cholgrirangna bang·en kamrangko ka·engani gimin aro bang·bea scheme-rangko ra·gate on·engani gimin manderangni gisiko BJP-na ka·donganirang dongkuenga,” ine Momin aganaha.
Batanggimin changgni Meghalaya Assembly election-rango BJP chu·sokgipa ong·na man·jaha ine ku·chake aganangengon, Meghalaya a·doko uamang neng·nikanirangko chagrongna nangengoba da·o MLA sakgni dongaha aro jinmani bakrime kamko ka·anichi uamang nambata salrangko nikna ka·dongenga ine gital state president parakataha.