U·IATTIMGIPAONI
AMPATI: Dokkanrango be·en bitinrangko jinmani nikrangrao paljachina gita High Court ge·etaniko on·manahani gimin Mongolbar salo, South West Garo Hills a·jani Deputy Commissioner RP Marak, dingtang dingtang songni Nokmarang, Gaonburarang, police officer-rang aro market committee-rang baksa Ampati Circuit House-o tom·aniko ong·atenba, iani bidingo agan-talatanirangko on·angaha.
Be·en bitinrangko palani bidingo High Court-ni on·gimin ge·etanirangko jinmana talate on·angengon, be·en bitinrangko jinmani nikao palgija dongnue palchina gita High Court, re·anggipa September-ni 19 tarikon ge·etaniko on·manahani gimin ia ge·etaniko be·en bitin pale cha·enggiparang aro bazaar committee-rangba manina nanga ine Marak parakataha.
Skangonin ia jolni manderang be·en bitinrangko bangbang dakgipa biaprangosa palahani gimin da·o rang·gitik ia dakbewalko dingtangataniara namen rakbegipa kam ong·enga ine janapatengon, manderangni rongtal an·talani aro jatni dakbewalko mande ra·na gitasa ia ge·etaniko High Court on·manahani gimin High Court-ni ge·etaniko manianian nambatgipa chol ong·enga ine DC parakataha.
“Ramasamrango donggipa dokkanrangkp apjitchinade chinga be·en palgiparangko draenga ong·ja indiba be·en bitinrangko rongtale rakkina pindape ba chipe donna man·gipa bosturango palchinasa aganenga aro ia niamko ja·rikgenchimode police-rangba maming ja·kurangko de·na nangjawa,” ine Marak aganaha.
South West Garo Hills a·jao palenggipa be·en bitinrangara cha·na namgipa ong·ama ong·ja, uko porikka ra·e nina gita bakan Food Safety officer-rang, be·en bitin palgipa biaprangona re·ange nigen ineba DC parakataha.
Ia tom·anio dongpae jinmana aganprakanggipa gipin manderangara, South West Garo Hills a·jani ADC YW Momin, AH & Vety Officer Dr NA Sangma aro gipinrang ong·a.