U·IATTIMGIPAONI
TURA: Prime Music Incubation-ni Grand Finale-ko Sukrobar salo, a·dokni Chief Minister Conrad K Sangma, Tura-ni District Auditorium-o a·bachengate on·angaha.
Ia program-ko a·bachengatanio ua, re·baenggipa December jao ong·atna sienggipa Me·gong Bibal Festival-ni theme song ba pangchakani gitkoba kulie on·angjolaha.
Ia Music Incubation program-ko a·bachengate on·anganio a·dokni Chief Minister, jinmana aganprakangengon, chadamberangko namgipa ramao re·atna gita uamangni changa sapanirangko namao jakkalaniara an·ching sakantini daitoan ong·a ine parakataha.
“Ia music incubation program-ara doka dam·ani aro git ring·anirango gisik nanggipa chadamberangna, an·tangtangni changa sapanirangko mesokna namgipa chol ong·gen,” ine Sangma aganaha.
Meghalaya a·doko kal·susaani, doka dam·ani aro bading chiwalanio changgipa sapgipa manderangko ra·dona gita sorkari, dingtang dingtang program-rangko ra·gate on·aha ineba Chief Minister parakataha.
“Meghalaya a·doko songdongenggipa manderangoni 75 percent-ni gitade chadamberangan ong·ani gimin chadamberangko mangrakbatataniara sorkarini daitoan ong·a aro ia miksongani baksasa sorkari, chadamberangko nambatgiparang ong·atna gita nangani kri ja·kurangko de·enga,” ine Sangma aganaha.
Batanggimin bilsi gittamni gisepo sorkari, Meghalaya Grassroots Music-chi sak 3000-na baten git ring·anio aro doka dam·anio gisik nanggipa chadamberangna dakchake on·na man·aha ineba Chief Minister parakataha.