U·IATTIMGIPAONI
SHILLONG: Re·baenggipa 2024 bilsion Lok Sabha aro Khasi/Jaintia Hills Autonomous District Council-ni election-koba ong·atna siengahani gimin ia election-rango susana gita Meghalaya a·dokni Congress dolba tarisamsoengaha.
Meghalaya Pradesh Congress Committee (MPCC)-ni president Ronnie V Lyngdoh-ni parakatani gitade, Lok Sabha aro district council election-rango susana gita tarisamsoengahaon, bakan uamang susana miksongenggipa candidate-rangni dorgastorangko okamgnok.
“Chinga election-rango susana tarisamsoengaha aro iana chinga bakan susana miksongenggipa candidate-rangni dorgastorangko okamgnok,” ine Lyngdoh parakataha.
Ia chang election-o Congress, doltangari susaaigenma ine sing·anina aganchakaniko on·angengon, da·o dipet dingtang dingtang dolrangni nangrime bikotgipa I.N.D.I.A alliance name tik ka·kujaengani gimin doltangari susaaigen ine MPCC-ni president parakataha.
Ia sal somoirango Voice of the People’s Party (VPP)-ni bilakrorobaengani gimin sing·on, “Pilak dolrangan election-ode susana man·aia indiba bon·kamao dilgipako seokanide manderangni jakosa ong·aia,” ine Lyngdoh parakataha.
“Election-rango susaengon, chinga badiaba dolkosan ong·aigija pilak dolrangkon dal·e ra·a,” ine ua aganaha.
Shillong Lok Sabha constituency-o da·o ong·enggipa MP Vincent H Pala, susataina sienga indiba Tura Lok Sabha seat-nade candidate-rangko sandikugen ineba Lyngdoh parakataha.