MBOSE-ni Golden Jubilee manianiko matchotata
U·IATTIMGIPAONI
TURA: Chadamberangan a·dokni dal·batsranggipa gam aro cholrang gita ong·a aro chadamberangni changa sapanirangko namao jakkalna gita sorkari kam ka·enga ine Bristibar salo, Meghalaya Board of School Education (MBOSE)-ni Golden Jubilee ba bilsi 50 gapaniko maniani bon·kamgipa salo, a·dokni Chief Minister Conrad K Sangma parakataha.
“Sorkarini kamrangko ka·anio chadamberangko bijangchio donaniara sorkarini daitoan ong·a maina basakobade scheme-rangko ra·gatanio sorkari, pangnan scheme-ko ra·gataniosan gisik on·e, ia scheme-ko maini gimin ra·gatenga ukode ma·sina gualronga. Uni giminsa chingni kamrango pangnan chinga chadamberangko mikkango done kamrangni gimin chanchie ja·kuko de·a,” ine Sangma aganaha.
Mandeko Isolna kengipa aro saksa gun gnanggipa ong·ataniara a·doko songdongenggipa mande sakantini daitoan ong·a ineba ua aganaha.
Uttar Pradesh gita dakgipa gipin a·dokrang baksa tosusagenchimode Meghalaya a·dokara namen chonbegipa a·doksan ong·aiani gimin a·dokni namroro silroroanina sorkari, kam ka·na changgipa aro u·i-ma·sigipa manderangko bikotna jotton ka·skaenga ineba Chief Minister parakataha.
Assam a·dokoni ma·ekani ja·man dingtang dingtang neng·nikanirangko chagrongna nangahaoba MBOSE-ko 1973 bilsio a·bachengatna gita krenge kamrangko ka·dilangahani gimin Meghalaya a·dokni pagitchamrangko mittelpilangengon, dingtang dingtang dilgiparangni aro official-rangni rakbee kamrangko ka·ahani a·sel MBOSE bilsi 50-ko ga·dapaha aro ian a·dokna namen katchaani somoi ong·chongmota ine Sangma aganaha.
Education department-ko chalaianio dingtang dingtang neng·nikanirangko chagrongna nangenga ine janapatengon, iandakgipa neng·nikanirangko chagrongna nangengoba Meghalaya a·dokko lekka porani a·bao a·songo nambatsranggipa ong·atna pilakan tikkelangkuna nanga ine Chief Minister aganaha.
Ia tom·anio a·dokni Education Minister Rakkam A Sangma-ba dongpae jinmana aganprakangengon, mandeni changa sapani aro u·i-ma·sianikode bida budina agre mamingchiba tona man·jawa ine parakataha.
Meghalaya a·doko lekka porako tang·doatanio a·dokni Chief Minister, bang·en kamrangko ka·angkugen ineba ua an·tangni ka·dongchakenganiko parakataha.
Ia tom·anio a·dokni Chief Secretary DP Wahlang, MBOSE-ni gimin talataniko on·angengon, MBOSE-ko 1973 bilsio a·bachengani ja·man 2006 bilsio gital daktaiaha aro da·alo ia board-ni bilsi 50 gapaniko manienga ine parakataha.