U·IATTIMGIPAONI
SHILLONG: Meghalaya a·doko English baksana Khasi ku·sikkoba official language dake ra·gatchina Khasi Authors’ Society (KAS)-ni dabiangani ja·man English aro Khasi baksana Garo ku·sikkoba official language dake ra·gatchina Khasi Students Union (KSU) dabiangskaaha.
KSU-ni president Lambokstar Marngar-ni parakatani gitade, Khasi aro Garo ku·sikrangko a·doktangon official language dake ra·gatchengja ong·ode ia ku·sikrangko Constitution-ni Eighth Schedule-o napatchina dabianirangba ong·na amgijanisa ong·aiachim.
“A·doktango jakkalgipa ku·sikrangko official language dake ra·gataniara a·dok sorkarini daitoan ong·a. Khasi aro Garo ku·sikrangko a·doktangon official language dake ra·gatkujaenga ong·ode maikai Khasi aro Garo ku·sikrangko Eighth Schedule-o napatna ka·dongenga?” ine Marngar sing·doataha.
Khasi Authors Society-ni dabianiara ong·akon dabienga ine janapatengon, ia dabianiko chu·sokatanide da·o sorkarini jakosajok ine KSU president parakataha.
Da·o dipet Meghalaya a·doko English ku·sikkosa official language dake jakkalengachim aro Khasi, Garo ku·sikrangkode associate official language dakesa jakkalskakuengachim ine nikna man·a.
Indake ong·engon, adita salrangna skang, KAS-ni membor-rang, a·dokni Chief Minister Conrad K Sangma-ko grongenba, Khasi ku·sikko a·dokni official language dakchina didie, dingtangmancha memorandum-ko on·angaha.
Garo ku·sikko a·dokni official language dake ra·gatani gimin janapatengon, a·doko official language-ko ra·gatna maming champenganirang dongja aro minggni ba minggittam ku·sikrangko official language dake ra·gatna man·aigen ine KAS-ni president DR Nonglait parakataha.
