U·IATTIMGIPAONI
SHILLONG: Shillong songjinmao ong·atenggipa Cherry Blossom Festival-ko Robibar sal man·chape ong·atengani gimin dingtang dingtang dolrang jegaltokengon, Kristianrangni gimin chanchie ia festival-na dongimin salko dingtangatchina gita Meghalaya United Christian Forum (MUCF)-ba a·dok sorkariko didiataha.
Cherry Blossom Festival-ko Robibar sal man·chape ong·atengani gimin an·tangtangni suk ong·gijaniko parakatengon, salantian Isolni pattigimin sal ong·a indiba Robibar salara badiaba ma·malrangna agrede bang·bata Kristian ma·malrangni Isolko olakkina jakkalgipa salsa ong·a ine MUCF-ni chairman Rev Batkupar Dunai talataniko on·ataha.
“Cherry Blossom Festival-ko Robibar salo matchotatna miksongenga ine chinga koborrangko man·soengani gimin Kristianrangni gimin chanchie ia salna donsogimin program-rangko dingtang salona ra·doatchina chinga a·dok sorkariko mol·molenga,” ine Rev Dunai parakataha.
Adita salrangna skangsan, Khasi Jaintia Christian Leaders Forum (KJCLF)-ba a·dok sorkarini ong·atenggipa program-ko jegalengade ong·ja indiba Robibar salara Kristianrangna aro dingtang dingtang mondolirangna rongtalgipa salsa ong·a ine parakatahachim.
Ia chang Shillong Cherry Blossom Festival-ko November 17 tarikoni November 19 tarikona Bhoirymbong-o donggipa Madan Kurkalang-o ong·atengachim.
Ia skang, Ri Bhoi a·jao dingtang dingtang dolrangni nangrime bikotgipa Joint Action Committee (JAC)-ba, Cherry Blossom Festival-ko Robibar salo matchotatengani gimin suk ong·gijaniko parakatahachim.