U·IATTIMGIPAONI
SHILLONG: Ia bilsini Cherry Blossom Festival-ko Robibar salo matchotatengani gimin dingtang dingtang dolrang jegaltokengon, Robibar salo ia program-ko giljarang jokmane attamo ong·atskachina gita sorkari ge·etaniko on·angaha.
Iani bidingo kobor ra·timgiparangna talataniko on·angengon, Cherry Blossom Festival-ko Robibar salo matchotatengoba, ia salni program-rangko giljarang jokmanesa attamchipak ong·atskachina sorkari, organizer-rangna ge·etaniko on·aha ine Bristibar salo, a·dokni Deputy Chief Minister Prestone Tynsong parakataha.
Cherry Blossom Festival-ko ia chang Robibar salo matchotatengani gimin talataniko on·angengon, iako sorkari maming miksongani gnangde dakjaha aro ian salgittamni festival-sa ong·ani gimin basakobade Robibar salo a·bachengatna aro basakobade Robibar salon matchotatna nangao ga·akaia ine Tynsong parakataha.
Robibar salo ia Cherry Blossom Festival-ni program-ko giljarang jokmane attamo 3:00 bajini ja·mansa a·bachengatchina organizer-rangko aganmanaha ine janapatengon, mikkang bilsionide darangnaba gisik saani dongjana gita sorkari, ia festival-ko sal niroke ong·atna jotton ka·gnok ine Deputy Chief Minister parakataha.
“Robibar salo ia program-ko giljarang jokmane attam 3:00 bajini ja·mansa a·bachengatchina chinga organizer-rangko ge·etmanaha. Uni gimin ia changde pilakkon sorkari baksa bakrimchina chinga mol·molenga. Mikkangchide chinga ia program-ko sal niroke ong·atna jotton ka·gnok,” ine ua aganaha.
Manderangni jegalanirangko sorkari ma·sichakenga ine janapatengon, iani giminsa sorkari, manderangni namgnina somoirangko dingtangatna jotton ka·enga ine Deputy Chief Minister parakataha.
Ia bilsio Cherry Blossom Festival-ko Robibar sal man·chape ong·atengani gimin Ri Bhoi a·jani dingtang dingtang dolrangko man·chape a·dokni Kristian dolrang, jekai Meghalaya United Christian Forum (MUCF) aro Khasi Jaintia Christian Leaders Forum (KJCLF) dolrangba suk ong·gijaniko parakattokahachim.
Robibar salara badiaba ma·malrangna agrede bang·bata Kristian ma·malrangni Isolko olakkina jakkalgipa salsa ong·ani gimin Robibar salo iandakgipa program-rangko ong·ataniara kraani ong·ja ine dingtang dingtang dolrang jegaltokahachim.