U·IATTIMGIPAONI
SHILLONG: A·dokni Lower Primary School-rango ge 1,200 aro Upper Primary School-o ge 300-400 bangbang dongenggipa post-rango gapatna gita a·dok sorkari November jao interview-rangko ong·atanggen ine Education Minister, Rakkam A Sangma Sukrobaro parakataha.
“MTET pass ka·gimin candidate-rangko interview ra·na gita chinga chanchie donmanaha, jeon Lower Primary School-rango ge 1,200 aro Upper Primary School-o ge 300-400 bangbang dongenggipa post-rango gapatna gita November 15 tarikoni interview-rangko a·bachengatgnok,” Minister parakaha.
Ua agane je “lower primary school-ni interview-ko November 15 tarikoni ra·gen aro Krismasna skangan pilak kamrangko matchotatna gita chinga jotton ka·enga.”
“Krismasna skangan, qualify ong·gipa candidate-rangna appointment letter-rangko on·na gita chinga jottn ka·gen,” ua agandapaha.