U·IATTIMGIPAONI
TURA: Khalu Songmong aro Rongcheng songrangona salanggipa bijoli line-rang nosto ong·e dongengani a·sel songni manderang neng·nikanirangko chagrongna nangtokengaha ine West Khasi Hills a·jani Rengdim-o donggipa United A·chik Youth Front (UAYF) parakatenba, ia songrangona ra·anggipa bijoli line-rangko ta·raken taripile on·china Nongalbibra MeECL sub-station-ni official-rangko didiataha.
UAYF dolni parakatani gitade, ia songrangona salanggipa bijoli line-rang, 2018-19 bilsirangni gisepon mikka balwa ta·rakmiting somoio nosto ong·atako man·ahachim aro untalan ia songrango bijoli gri dongna nangtokengahachim.
Nosto ong·e dongenggipa bijoli line-rangko taripile on·na gita MeECL-ni manderang maming kamrangko ka·jaenga ine matnangatengon, ia songrango bijoli dongjani a·selan songni manderang andal min·diksa dongna nangtokenga ine UAYF parakataha.
“Uni gimin ia songrangona ra·anggipa bijoli line-rangko ta·raken taripile on·china chinga dingtang dingtang department-rangko didienga. Ia songrango bijoli gri ong·e dongani bilsibri batpilengahani a·selan songni manderang aro mongsongbate skulrango poraienggipa bi·sarang neng·nikanirangko chagrongna nangtokengaha,” ine UAYF parakataha.