U·IATTIMGIPAONI
TURA: Adita salrangna skang, South West Garo Hills a·jao lower division assistant (LDA)-ni kamna district selection committee (DSC)-ni parakatgipa result-o sorkarini niamrangko pe·aha ine matnangenba, ia result-ko den·galpile gital dake nipiltaichina South West Garo Hills a·jani GSU, AHAM aro NGCO dolrang dabiataha.
Koborko on·ani gitade, South West Garo Hills a·jao LDA-ni kamna DSC-ni result-ko re·anggipa October 17 tariko parakatahachim.
Ia result-ko parakanio June-ni 14 tariko sorkarini on·gipa ge·etaniko ja·rikjaha ine matnangatengon, niamko ja·rikjahani a·sel South West Garo Hills a·jani bang·bata chadamberangan kamna seokako man·tokjaha ine NGO-rang parakataha.
“Kamna manderangko seokengon, kam dongani kri a·jatango songdongkamgipa candidate-rangkosa nichengna nanga ine June jani 14 tariko sorkarini on·gipa ge·etanion tale seani gnangchim. Garo Hills-o badiaba kamna dorgasto galgiparangoni Khasi aro Jaintia-rang dongjagenchimode, 80 percent-kon chu·gimik Garo candidate-rang man·na nangachim. Indake ong·genchimoba, adita salrangna skang South West Garo Hills a·jao DSC-ni result-rangko parakanio sorkarini on·gimin niamrangko ja·rikjahani a·sel a·jatangni chadamberang an·tangtangni man·gniko gimaatna nangaha,” ine dolgittam NGO-rang parakataha.
DSC-ni parakatgipa result-ko den·galpilchina gita South West Garo Hills a·jani Deputy Commissioner-ko didiatengon, sorkarini on·gimin niamko ja·rike gital dake written examination-ko ra·pilchina gita NGO-rang dabiangaha.