U·IATTIMGIPAONI
TURA: Re·baenggipa November-ni 4 aro 5 tarikrango Tura Diocese-ni Golden Jubilee ba bilsi 50 gapaniko Sacred Heart gilja nok aro Don Bosco Higher Secondary School kal·chakramo manina siengani gimin ia antini Sonibar salode Tura Chandmari-o cha·rongenggipa bazar antiko chipe donanggen ine Tura Municipal Board (TMB) u·iataha.
Iani bidingo u·iataniko on·angengon, re·baenggipa Sonibar salode me·su samjak aro ma·manti bosturangko ra·bae Chandmari jolo paljachina gita TMB didiataha.
Sonibar salo, Tura Diocese-ni Golden jubilee-ko maniengani gimin Chandmari-oni Sacred Heart gilja nokona dakanggipa ramarango apchangket ong·jana gita unsalo, ia rama gita skatang re·rurajachina aro ramarango garirangko donjachina gitaba TMB didiataha.
Ia ramao cha·ani ringanirangko ba uandakgipa dokkanrangko kulina man·jawa ineba TMB u·iataha.
Sonibar changantian Tura-ni Chandmari ramao, mongsongbate Sacred Heart gilja nokona dakanggipa ramao anti cha·rongengani a·sel ia ramao garirangni apchangket ong·aniko nikna man·rongengachim.