U·IATTIMGIPAONI
TURA: West Khasi Hills a·jani Rengdim jolo police outpost-ko songchina dabie United A·chik Youth Federation, Meghalaya a·dokni Home Minister-na sedoataha.
Rengdim jolo police outpost damsako kulie on·china Home Minister-ko didiatengon, Rengdim jolo police outpost dongkujani a·selan ia jolni aro wilwilao donggipa dam 20 songni manderang, maiba a·selrang ong·na nanggenchimoba kilometer 17-mang chel·ao donggipa Shallang-ona re·angesa police-rangna u·iatna man·enga ine UAYF parakataha.
Rengdim-o bazaar antiko kuliahani a·sel da·o ong·gija dakgipa kamrangko nikna man·rongenga ine janapatengon, Rengdim jolo police outpost-ko kuligenchimode, ia bazaar antirango ong·gija dakanirangko nirok sandina aro manderangna nambate naljokanirangko on·na man·genchim ine UAYF parakataha.
“Batanggimin somoirango Rengdim jolrango bang·en ong·gija dakgipa kamrangko nikna man·aha aro ia jolo police outpost donggenchimode iandakgipa kamrangko champengna man·genchim,” ine UAYF-ni dilgiparang talataniko on·angaha.
Rengdim jolrango songdongenggipa manderang maming kenchakani gri naljokani gnang janggi tangpana man·na gita ta·raken ia jolo police outpost-ko kulie on·na nanga ineba UAYF, a·dokni Home Minister-ko didiataha.