U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o apsan candidate-ko susaatani bidingo aro nangrime kamrangko ka·ani bidingo chanchirimna gita re·baenggipa antio United Democratic Party (UDP) aro Hill State People’s Democratic Party (HSPDP) dolgnini tom·aniko ong·atna sienga.
UDP aro HSPDP dolrang nangrime Regional Democratic Alliance (RDA)-ko songahachim aro da·o dipet Lok Sabha election-na candidate-ko seokkujaengoba, apsan nangrime candidate saksako susaatna tik ka·ahachim.
“RDA-o chinga dolgni donga indiba batanggimin chang election-rango gitan ia changoba chinga apsan candidate-ko seokgen. Chinga dolgnian ma·sichakgrikesa apsan candidate-ko seokgen,” ine HSPDP-ni president KP Pangniang aganaha.
Lok Sabha election-na uamang kamrangko a·bachengmanaha aro da·o uamang candidate saksako seokani bidingo chanchigen ineba ua aganaha.
Re·baenggipa bilsini Lok Sabha election-o UDP-oni susana sikenggipa manderangko UDP-ni dilgiparang nokchaksoaiengachim aro da·o dipet Khasi Authors Society-ni president DRL Nonglait aro HYC-ni gitcham president Robertjune Kharjahrin-ba UDP-ni tikitna dorgastorangko galengachim.
A·dokni Cabinet Minister Paul Lyngdoh, UDP-ni general secretary Jemino Mawthoh, vice president PT Sawkmie aro KHADC-ni gitcham CEM Titosstarwell Chyne-ba UDP-ni tikitchi susaana miksonganirang dongengachim