U·IATTIMGIPAONI
SHILLONG: Manipur a·doko jadok batpile so·sojengjeng ong·enganiko namatchipna man·jaengani gimin ma·mong sorkarini kosako jegale North East Students Organisation (NESO), re·baenggipa November 9 tariko, salgro salaram a·dokni pilak skotong songjinmarangon jingjengatna tik ka·angaha.
Iani bidingo u·iataniko on·angengon, Manipur a·doko so·sojengjeng ong·ani jadok batpilengahaoba ma·mong sorkari, tom·tomaniko ra·bapilna man·kujaenga aro ia pilakan ma·mong sorkarini gisiko nange kamko ka·jaengani a·selsa ong·enga ine Robibar salo, NESO-ni chairman Samuel B Jyrwa parakataha.
Manipur a·doko so·sojengjeng ong·aniko namatna gita ma·mong sorkari gisiko nangjaengani a·selan manderangni janggi aro gam-jinrangna kenchakna nanganirang ong·engkua ineba Jyrwa parakataha.
“Iani bidingo chinga NESO-ni gita re·anggipa October 31 tariko Guwahati-o tom·e chanchirimangenba, salgro salaram a·dokrangni skotong songjinmarango salsana jingjengataniko dakna tik ka·angaha,” ine NESO-ni chairman parakataha.