U·IATTIMGIPAONI
TURA: South Garo Hills aro West Khasi Hills a·jani dingtang dingtang A·chik songrango nanganirangko janapenba, South Garo Hills a·jani Nongalbibra Joint Action Committee, Darranggre Nokma Welfare Association aro West Khasi Hills Nokma Welfare Association-ni gita, Meghalaya a·dokni Chief Minister Conrad K Sangma-na chitti sedoataha.
Ia dolrangni Chief Minister-na sedoatgipa chittio janapatani gitade, South Garo Hills a·jani Rongding Awe, Nongalbibra, Jadigittim, Era Aning, Agreng jolrango songdongenggipa manderang aro Simsang chibima paksao songdongenggipa manderang, re·a doani cholrang dongjani dingtang dingtang biaprangona re·ruraanio neng·nikanirangko chagrongna nangtokenga.
“Jadigittim PWD ramaoni, Era Aning aro Agreng gita Simsang Kansruisuk Wari-ona dakanggipa ramakon South Garo Hills aro West Khasi Hills a·jani sima jolo donggipa bang·a songni manderangan re·rurana jakkaltokengachim indiba ia ramani obosta namsrangjahani a·sel songni manderang re·ruraanirango neng·nikanirangko chagrongna nangtokenga,” ine ia dolrang janapatenba, ia ramako ta·raken black topping ka·e tarichina gita sorkariko didiataha.
Kansruisuk Wariko dolong kabatchina aro Simsang Kansruisuk songoni Rengdim songona rama tarie on·china gitaba ia dolrang, a·dokni Chief Minister-ko mol·molataha.
North Garo Hills a·jao donggipa Dainadubi-oni South Garo Hills a·ja gita West Garo Hills a·jani Dalu-ona tariangenggipa ramani gimin janapatengon, ia ramako ta·rake matchotatna man·genchimode re·a doanio altubatatanisan ong·aigija, ia jolrango namroro silroroanikoba ra·bana man·gen ine ia dolrang, Chief Minister-ko didiataha.
South Garo Hills a·jani Balpakram National Park-o kilometer 1-ona kingking Eco Sensitive Zone-ko ra·gatchina gitaba uamang, Chief Minister-ko didiataha.
2022 bilsini November jao songe on·anggipa Siju C&RD Block-ni gimin janapatskaengon, ia gital block-ko songaoni da·o bilsisa ong·pilengahaoba da·alonan block office-ko chalaikujani a·sel songni nokni manderang maming namgnirangko man·tokjaenga ine ia dolrang parakatenba, ia gital Siju C&RD Block office-ko ta·raken chalaichina a·dok sorkariko didiataha.