U·IATTIMGIPAONI
TURA: Chang 47-gipa 100 Drums Wangala Festival ba dama bol 100-ko doke Wangala manianiko Bristibar salni bako Jengjal-ni Baljek Airport-o a·bachengataha aro ia skanggipa salo Handloom & Handicraft Exhibition-ko a·bachengate on·angan baksana jatni kal·susaanirangkoba ong·atangaha.
100 Drums Wangala manianiko a·bachengatani somoio Garo Hills Autonomous District Council (GHADC)-ni Chief Executive Membor (CEM) Albinush R Marak, mongsonggipa sokgipa ong·e bakko ra·angaha aro unbaksa GHADC-ni Deputy CEM Nikman Ch Marak, GHADC Executive Membor-rang, chong·motan Nathawal S Marak, Heninson R Marak, Hundred Drums Wangala Festival Committee (HDWFC)-ni dilgiparang aro gipinrangba dongpae bak ra·angaha.
Ia 100 Drums Wangala manianiko a·bachengatani somoio GHADC-ni CEM, jinmana aganprakangengon, ia chang 47-gipa 100 Drums Wangala manianiko ong·atna rakbee kamrangko ka·ahani gimin committee-ni membor-rangko mittelpilangaha.
Pagitcham ma·gitchamrangni a·bachengatgipa ia dakbewalko ripinge rakkiangkuchina gita didiangengon, jatni dakbewal rikbewalrang gimajana gita iandakgipa manianirangko committee-san ong·aigija jat gimikan ripingna nanga ine Marak didiangaha.
Ia Wangala manianiko a·bachengatanio 100 Drums Wangala Festival Committee-ni chairman Ronald Rikman Sangma-ba jinmana aganprakangengon, Ganol chibimao hydel project-ni dam-ko rikahani a·sel Wangala A·dam Chibragre-ona tarianggipa dolongko da·o chi mripahani gimin ia chang 47-gipa 100 Drums Wangala Festival ba Dama Bol 100-ko doke Wangala manianiko Jengjal-o donggipa Baljek Airport-o sokachakskana nangaha ine talate on·angaha.
Ia 100 Drums Wangala manianiko a·bachengatanio Handloom & Handicraft Exhibition-koba GHADC-ni CEM, do·ga oe on·angjolaha.
Ia 100 Drums Wangala manianiko a·bachengatani salo, Jakpong Pe·a, Rong·ma Chilsusaa, Rong·ma Gosusaa, Wa·pong Sika, An·ding Oka aro uandakgipa jatni dingtang dingtang kal·susaanirangkoba ong·atangaha.
Ia skanggipa salo, dingtangmancha budu salgrikanikoba ong·atangaha, jeon skanggipa boksisko Mitela Group aro gnigipa boksisko Rongkhon dol cheangaha.
Ia chang 47-gipa 100 Drums Wangala manianiko a·bachengatani salo, Tura Government College-ni chatro chatrirang aro Assam-o donggipa Garo Cultural Forum-ni gitaba Wangala chroke mesokangaha.