U·IATTIMGIPAONI
Tura: Sal gittam salrangna ong·atgipa Hundred Drums Wangala festival gittam-gipa aro bon·kamgipa salo manderang bang·en sokba-nirang baksa nambee aro tom·tome matchotangaha.
Meghalaya Infratech aro Innovations Corporation Limited-o Board Directors-ni Chaiman Chief Guest ong·e aro Mahendraganj Assembly Constituency-ni MLA, Sanjay A Sangma tom·ao aganao ia maniako bilsio ong·atachi A·chik jatni daka-rikani aro dak-bewalrangko ripingna uamangni on·kange aro jotton ka·anina wangala committee memborrangko ua mittelangaha.
Ia jatni dakbewalko maniani mongsonggipa ong·aniko agan-mesoke, ia maniani a·bri jatni janggi tangani bewalko nangrimatenga aro dingtangmancha a·bri jatko ma·siataniko, niamrangko aro dakbewalrangko ripingna mongsonggipa ong·a ine Chief Guest aganaha.
Manderang da·ororo wangala chrokaniko maikai chrokna nanga namedake ma·sija uni gimin jeba maiba tom·anirangko ong·atao uamang ranta ka·na aro chrokna nanga aro education department skulrango chatro-chatrirangna skina ja·kuko de·na nanga ua aganaha aro Wangala maniao jemangan bakko ra·a jatni gandingrangko ganchina ua sakantikon mol·molaha.
Dadenggre Assembly Constituency-ni MLA Rupa M Marak maniao Guest of Honour ong·e uni Wangala Committee-ni memborrangko mittele agana baksana ong·atgipa dolni namgninasan mania-niko ong·atenga ine skango ua chanchiachim indiba Wangala A·dam Chibagre-o skang bilsirango dong-paani ja·mano maniani mongsonggipa ong·ani aro mikkangchi an·chingni re·baenggipa chasong-rangna an·chingni atchu-ambinirangni jatni daka-rikaniko aro identity-ko ripingna nanganiko anga ma·sina a·bachengaha. Mande siani ja·mano siani niam-retirangko dakani gita an·chingni jatni gipin gipin daka-rikanirangko ja·rik-nirangko aro chawari sing·-na ba rim·na amengon niamrangko aro gipin gipin jatni dakbewalrangko ma·sie ra·china ua sakanti-kon ku·pattiaha. Ia mania-niko ong·atna memborrang-ni on·kane kamrangko ka·anina mittele mikkangchi ia manianiko dal·bate aro nambate maniangkuna didian baksana uni namnik-paaniko ua janapaha.
West Garo Hills Deputy Commissioner, Jagdish Chelani-ba A·chik ku·sikchi tom·bagiparangna agana jotton ka·aha aro wangala maniani dingtangmancha aro mongsonggipa ong·ani gimin aganaha.
Wangala Committee-ni Chairman Ronald Riknam Sangma a·bachengao tom·bagiparangko rimchak-soani kattako aganao Wangala maniani itihas aro a·bachenganiko aro a·chik jatni daka-rika dakbewal-rangko ripingna nanganiko agan-mesokaha.
Wangala Anthem, “Dimdim Dimchong Dachichong” je gitan Millickson K Sangma sagini tarigipa gitchambegipa mingsinggipa jatni git ong·a uko maniani changantion ringronga.
100 Drums Wangala A·chik-rangni ratman-tetmano maniani ong·a jeon kusi ong·e, doka-damani-rang aro chrok-me·saani-rang baksa bang·a dingtang dingtang jatni mittelpil-skaani maniani dakbewal-rangko manaini ong·a.
Germany, Switzerland, France, Bangladesh, Tamil Nadu, Pune, Assam-ko man·chape chel·e-sepangoni a·song-chiga nina-rona re·bagiparang, aro bang·a biaprangoni kobor ra·timgiparangni wangala manianiko nina re·baha aro Rugala gita dakbewalrangko uamang daksningaha jekon Song-nokni nokmachi wangalna salsa skango pattigipa-rarongipa Misi Saljongna songgimin mi baksa minil bitchirangko aro me·su-samjakrangko on·cheng-aha, aro antigimik wangala maniani a·bachengna sal-gipino nokma unin nokni krongo Sa·sat So·aniko dakaha.