U·IATTIMGIPAONI
TURA: COVID-19 sajinmani somoirango Tura Civil Hospital-o dingtang dingtang kamrangchi dangdike on·enba da·o kam bon·ata man·gipa manderang, ia 2023 bilsini April jaonin an·tangtangni dormaharangko man·tokkujaengani gimin aro uamangni kamrangko October 1 tarikonin bon·attokahani gimin kamrangko niatchina gita Meghalaya Legislative Assembly-ni Speaker aro North Tura-ni MLA Thomas A Sangma-na sedoataha.
Koborko on·ani gitade ia manderangko, COVID-19 sajinmani somoio Health department, dingtang dingtang kamrango rakkiahachim indiba uamangna jadokni dormaharangko matchote on·gija da·o sorkari, uamangni kamrangko bon·attokahachim.
Iani bidingo an·tangtangni suk ong·gijaniko parakatengon, “Chinga 2023 bilsini April ja intalan an·tangtangni dormaharangko man·kujaenga aro chingni kamrangko October 1 tarikon bon·attokahani a·sel chinga da·o neng·nikanirangko chagrongna nangtokengaha. Uni gimin chingni neng·nikanirangko niatpachina chinga nang·ko mol·molatenga,” ine Assembly-ni Speaker-na sedoatgipa chittio, Tura Civil Hospital-ni COVID-19 staff parakataha.