U·IATTIMGIPAONI
SHILLONG: Meghalaya a·doko 108 service-ko chalaina gita dakkienggipa dingtang dingtang company-rangni a·kangani aro matnanggrikanirangko Health department nikuengani a·selsa 108 service-ko chalaina company-ko seokanio somoi nangkuenga ine Sukrobar salo, a·dokni Health Minister Ampareen Lyngdoh parakataha.
A·doko 108 service-ko chalaina dakkienggipa dingtang dingtang company-rangni gisepo matnanggrikanirangni bang·en jajaatanirang ong·katenga ine janapatengon, ia company-rangni matnanganirangkoba uamang nina nangaon ga·akaiani giminsa ia company-rangni a·kangani aro matnanganirangko nipilchina gita dingtang dingtang agency-rangna seatenga ine Lyngdoh parakataha.
Ia company-rangni a·kangani aro matnanggrikanirangko namatna man·ahaode, 108 service-ko chalaina gita company-ko seokanio kamrang ta·rakbatgnokchim ineba ua aganaha.
Meghalaya a·doko 108 service-ko chalaina dakkienggipa mitam company-rangni kosako gital dake matnanganirang ong·kattaiahani a·sel da·o 108 service-ko chalaina company-ko seokanio sorkari, neng·nikanirangko man·na nangtaiengahachim ine nikna man·a.
A·doko 108 service-ko chalaina dakkienggipa company dolsani, National Health Mission-ni Mission Director-na sedoatani gitade, dakkienggipa company-rangoni dolgni, tender lekkao janapgimin ‘conflict of interest’ niamrangko pe·ahachim.
Mission Director-na sedoatgipa chittio parakatani gitade, Medulance aro Kubera Transport Solutions (Rakshak) company-rangara Delhi sorkario apsan ‘CATS’ project-ko kam ka·enggipa dolrangan ong·achim.