U·IATTIMGIPAONI
SHILLONG: Mikkang bilsionide, Meghalaya a·dokni North Eastern Indira Gandhi Regional Institute of Health & Medical Sciences (NEIGRIHMS)-o ge 100 MBBS seat-rang donggnok aro ian MBBS-ko poraina sikenggipa a·dokni chatro chatrirangna namgipa chol ong·gnok.
Da·o dipet NEIGRIHMS-o dam 50 MBBS seat-rangsan dongkuengpitichim.
Indake ong·engon, NEIGRIHMS-o mikkang bilsionide ge 100 MBBS seat-rang baksana B.Sc Nursing-naba ge 100 seat-rang donggnok ine NEIGRIHMS-ni Director Nalin Mehta parakataha.
Mehta-ni parakatani gitade, Mizoram a·doko MBBS seat-rangko komiatengahani gimin NEIGRIHMS-o MBBS-ni seat-rangko bariataniara Meghalaya a·dokni chatro chatrirangna namgni ong·gnok.
Iani bidingo u·iataniko on·atengon, NEIGRIHMS-o MBBS seat-rangko ge 100-ona bariatna gita ma·mong sorkari lekkani kamrangko ta·raken ka·engaha aro NEIGRIHMS-o kam ka·giparangko rakkina gita a·bachengatengaha ine NEIGRIHMS-ni Director parakataha.