U·IATTIMGIPAONI
WILLIAMNAGAR: East Garo Hills a·jao Meghalaya a·dokni Cooperation department, Meghalaya Cooperative Apex Bank (MCAB), Meghalaya Livelihoods & Access to Markets Project, Meghalaya Basin Management Agency-ni nangrime antigimin manianggipa Cooperative Week-ko Sombar matchotataha.
Ia program-ko ong·atanio, Meghalaya a·dokni PHE Minister Marcuise N Marak, mongsonggipa sokgipa ong·e jinmana aganprakangengon, Meghalaya a·dokko billion 10 economy ong·atna gita a·doko pilakni gitan namroro silroroaniko ra·baanian Chief Minister-ni niksamsoani ong·enga aro ia ra·bianiko chu·sokgipa ong·atna a·dokni mande sakantian rakbee kamko ka·na nangenga ine aganangaha.
A·doko namroro silroroaniko ra·bana gita sorkarini dingtang dingtang kamrango bakrimaniko on·china gitaba ua jolo songdongenggipa manderangko didiangaha.
FOCUS aro FOCUS+ program-ni ning·o a·dok sorkari, Bakdil NGO baksa nangrime, cooperative society-rangna tangka paisani gita dakchakanirangko on·aha ineba Marak aganaha.
Ia program-ko ong·atanio dongpae jinmana aganprakanggipa gipin manderangara, All Garo Hills Multipurpose Cooperative Societies-ni Secretary Fr Sunny Joseph Mavelil, MCAB-ni Managing Director OEJ Nongbri aro gipinrang ong·a.