U·IATTIMGIPAONI
TURA: Re·baenggipa December-ni 2 tariko Tura Diocese-ni Golden Jubilee manianiko Tura Don Bosco Mini Stadium-o matchotatnasiengani gimin ua salode Tura Chandmari-o cha·rongenggipa bazar antiko chipe donanggen ine Tura Municipal Board (TMB) u·iataha.
Iani bidingo u·iataniko on·angengon, December-ni 2 tarikode me·su samjak aro ma·manti bosturangko ra·bae Chandmari jolo paljachina gita TMB didiataha.
December-ni 2 tariko Tura Diocese-ni Golden jubilee manianiko matchotatna siengani gimin Chandmari-oni Sacred Heart gilja nokona dakanggipa ramarango apchangket ong·jana gita unsalo, ia rama gita skatang re·rurajachina aro ramarango garirangko donjachina gitaba TMB didiataha.
Ia ramao cha·ani ringanirangko ba uandakgipa dokkanrangko kulina man·jawa ineba TMB u·iataha.
Sonibar changantian Tura-ni Chandmari ramao, mongsongbate Sacred Heart gilja nokona dakanggipa ramao anti cha·rongengani a·sel ia ramao garirangni apchangket ong·aniko nikna man·rongengachim.