U·IATTIMGIPAONI
TURA: South Garo Hills a·jani Transport department-o contract-na kamko ka·enggipa manderangoni komibeoba sakdok manderang, bilsigni batpile an·tangtangni dormaharangko man·tokkujaenga aro saksade ja 20 batpile dormaha man·gija siangna nangaha ine kobor on·aha.
Kobor on·timgiparangni u·iatani gitade, Transport department-o kam ka·enggipa mitam manderangde an·tangtangni dormahako man·gija da·o ja 36 batpilengaha aro dormaharangko man·tokkujaenggipa manderangara, Miltder G Momin, Sebastian T Sangma, Babit M Sangma, Anurag S Sangma, Why Ch Marak aro Chesrang Ch Sangma ong·achim.
Ia manderangoni sakbride 2018 bilsio contract-na kamko ka·chengahachim aro uamangoni Why Ch Marak-de 2019 bilsio aro Chesrang Ch Sangma-de 2022 bilsio kamko ka·chengahachim.
Ia manderangna japrako gong 9000/- ka·e dormahako on·ani ong·achim.
Ia sakdok manderangoni sakbonganade ja 23-ni dormahakosan on·engkua indiba Chesrang Ch Sangma-de dormahakon man·srangkujaengachim.
Ia manderangoni dormaha man·gija sianggipara Why Ch Marak ong·achim ineba kobor on·aha.
Ia manderangna on·na nangkuenggipa dormaharangara, Miltder-na gong 3,42,000, Sebastian-na gong 3,36,840, Babit-na gong 3,06,00, Anurag-na gong 2,34,000, sianggipa Why Marak-na gong 1,80,000 aro Chesrang Sangma-na gong 99,000 ong·ahachim.
Ia dormaharangara ia bilsini March jaona hisapgimin dormaharangsan ong·aia aro da·o uamangni man·na nanganirang ja 6-7 batangpilengahachim.
Kobor on·timgiparangni u·iatani gitade, ia dormaharangni bidingo South Garo Hills a·jani DTO, Transport department-na sedoatrongengachim indiba department-onin dormaharangko on·atskakujaengachim.
Indake ong·engon, da·o Krismasni somoirang sokbaengahani gimin an·tangtangni man·na nangkuenggipa dormaharangko ta·raken watatchina gita ia manderang, sorkariko didiataha.