U·IATTIMGIPAONI
SHILLONG: South Garo Hills a·jani Transport department-o contract-na kamko ka·enggipa adita sak manderang, bilsigni batpile dormaharangko man·kujaenga aro uamangoni saksade dormaha man·chipgija siangna nangaha ine songbadrango seatani ja·man, ia obostani bidingo sandirokchina gita Meghalaya Human Rights Commission (MHRC), a·dokni Chief Secretary DP Wahlang-na ge·etaniko on·ataha.
MHRC-ni Secretary Federick M Dopth-ni parakatani gitade, ia a·selni bidingo chu·gimik inquiry-ko dakchina aro sal 15-ni gisepon report-ko on·china gita Chairperson T Vaiphei (Retd)-chi dilenggipa Commission, a·dokni Chief Secretary DP Wahlang-na ge·etaniko on·ataha.
South Garo Hills a·jani Transport department-o contract-na kamko ka·enggipa manderangoni komibeoba sakdok manderang, bilsigni batpile an·tangtangni dormaharangko man·tokkujaenga aro saksade ja 20 batpile dormaha man·gija siangna nangaha ine adita salrangna skangsan songbadrango see parakatahachim.
Kobor on·ani gitade, Transport department-o kam ka·enggipa mitam manderangde an·tangtangni dormahako man·gija da·o ja 36 batpilengaha aro dormaharangko man·tokkujaenggipa manderangara, Miltder G Momin, Sebastian T Sangma, Babit M Sangma, Anurag S Sangma, Why Ch Marak aro Chesrang Ch Sangma ong·achim.
Ia manderangoni dormaha man·gija sianggipara Why Ch Marak ong·achim ineba kobor on·aha.
Ia manderangna on·na nangkuenggipa dormaharangara, Miltder-na gong 3,42,000, Sebastian-na gong 3,36,840, Babit-na gong 3,06,00, Anurag-na gong 2,34,000, sianggipa Why Marak-na gong 1,80,000 aro Chesrang Sangma-na gong 99,000 ong·ahachim.
Ia dormaharangara ia bilsini March jaona hisapgimin dormaharangsan ong·aia aro da·o uamangni man·na nanganirang ja 6-7 batangpilengahachim.
Kobor on·timgiparangni u·iatani gitade, ia dormaharangni bidingo South Garo Hills a·jani DTO, Transport department-na sedoatrongengachim indiba department-onin dormaharangko on·atskakujaengachim.
Indake ong·engon, iani bidingo songbadrango see parakatani ja·man, ia obostako name sandirokenba sal 15-ni gisepon report-ko on·china MHRC ge·etaniko on·ataha ine Commission-ni Secretary parakataha.