U·IATTIMGIPAONI
TURA: Garo Hills Autonomous District Council (GHADC)-o krorni kror tangka paisarang donggenchimoba, ia tangka paisarangko NPP-chi chalaienggipa Executive Committee (EC)-ni dilgiparang, an·tangtangni aro an·tangtangni manderangni man·gnina jakkalsretengani a·selsa GHADC-o kam ka·enggiparangnade indita jarangni dormaharangko on·na man·jaenga ine Mongolbar salo GHADC-ni Opposition MDC-rang parakataha.
Opposition MDC-rangoni saksa aro Kharkutta-ni MDC Cherak W Momin-ni kobor ra·timgiparangna parakatani gitade, GHADC-o kam ka·enggipa manderangna indita jarangni dormaharangko on·na man·jaengani gimin aro Opposition MDC-rangni constituency-rangnade maming project-rangko on·na dongjaengani gimin am·sandianirangko dakon, GHADC-o bang·bea tangka paisarang donga aro bang·bea tangka paisarang dongani a·selan 2021 bilsioni a·bachenge da·alona kingking EC-ko chalaienggipa MDC-rang, an·tangtangni area-rangna aro an·tangtangni manderangna krorni kror project-rangko tikate, tangka paisarangko jakkalsretaha.
“GHADC-o tangka paisarang dongja ine pa·siksimani gimin chinga am·sandie nion da·alo, king 119 work order-rangko man·aha, jeon NPP-chi dilenggipa EC-ni dilgiparang aro MDC-rangni constituency-rango dingtang dingtang kamrangko ka·na krorni kror tangka paisarangko chamataha. Ia kamrangoni mitamna lak 20, mitam kamna lak 30, badiaba kamna lak 5, badiaba kamna lak 10 dake uamang krorni kros tangka paisarangko jakkalsretaha. Ia kamrangara nangchongmotgipa kamrangba ong·jachim indiba uamangni constituency-rango an·tangtangni manderangchi kam ka·atna gita earth work, badiaba kamrangara playground tariani ba uandakgipa kamrangsa ong·aia. Ia tangka paisarangko iandake jakkalsretgija, GHADC-o kam ka·enggipa manderangna dormaharangko on·na jakkalgenchimode kam ka·giparangni neng·nikanirangko bewalan namatna man·pagnokchim,” ine Kharkutta MDC, suk ong·gijaniko parakataha.