U·IATTIMGIPAONI
SHILLONG: Bostu salgipa rel garirangko Meghalaya a·dokona ra·bana man·genchimode uan game ge·e cha·enggiparangnasan ong·aigija, a·dokni pilak manderangnan namgnirangko ra·bagen ine Sombar salo, a·dokni Chief Minister Conrad K Sangma parakattaiaha.
Sombar salo, State Convention Centre-o ong·atanggipa Farmers’ Parliament matchotani ja·man kobor ra·timgipa manderang baksa agangrikengon, a·dokona rel garirangko ra·baani bidingo a·dok sorkari, ma·mong sorkari aro dingtang dingtang dolrang baksa agangrikengkua indiba badiaba badiaba dolrangni gisepo jajrengchakanirang dongkuengani gimin bostu salgipa rel garirangko ra·bana gita a·dok sorkari, kamrangko name ka·na man·kujaenga ine Chief Minister parakataha.
“Bostu salgipa rel garirangara an·chingna namgniko ra·bagipa ong·a aro ian game ge·e cha·enggipa manderangkosan ong·aigija a·dok gimikni manderangnan namgni ong·genchim. Iani bidingo chinga India sorkari baksaba agangrikahachim indiba badiaba badiaba dolrangni gisepo jajrengchakanirang dongkuengani gimin kamrangko name ka·na man·kujaenga,” ine Sangma aganaha.
Dingtang dingtang dolrangni jajrengchakanirangko sorkari namatchengna nangnikenga aro pilakni namnikani gride dakdrana nangnikjaenga ineba ua aganaha.
“Dingtang dingtang dolrangni nangnikani aro jajrengchakanirangko namatchenggijade chinga maming dakeba dakdrajawa ine a·bachengonin anga aganmanaha. Beben an·chingna namroro silroroanikode nanga indiba pilakni ra·chakna man·gni ong·skana nanga. Uni gimin chinga ia kamo pilak dolrang baksa apsan agangrikesa ja·kurangko de·gen,” ine Chief Minister aganaha.