U·IATTIMGIPAONI
SHILLONG: Jaintia Hills a·jao rel garirangko nangnikengama nangniktokjaenga, uko ma·sie ra·na gita a·jani manderang baksa chanchirimchengna nanggen ine Sukrobar salo, a·dokni Cabinet Minister aro Khliehriat-ni MLA Kyrmen Shylla parakataha.
Shylla-ni kobor ra·timgiparangna parakatani gitade, rel garirangko ra·baani bidingo da·o dipet sorkari mamingkoba tik ka·sranga ong·kujaenga indiba rel garirangko ra·baani bidingo manderang baksa agangrikna aro Jaintia Hills-o rel garirangko ra·baanichi namgni aro namgijanirangkosa sorkari nichengengachim.
Jaintia Hills a·jao NPP-ni bang·bata MLA-rangan rel garirangko ra·bana nangniktokengachim indiba NGO-rangde rel garirangko jegalsotokskaengachim.
Iani bidingo manderangni chanchianirangko u·iatchina didiatengon, Jaintia Hills a·jao rel gari ra·baaniko namnikgipa aro namnikgijagiparangba bang·en donga ine Shylla parakatskaaha.
“Mamingko tik ka·na skangba an·ching noktangtangon iani bidingo name chanchichengna nanggen. Rel garirangko ra·baanichi namgnirang donggenchimode an·ching ra·bana nanga ong·jaode jegalna nanga,” ine ua aganaha.
Rel garirangko ra·baani bidingo ua jinma baksa apsan tom·e chanchirimna nangnikengoba da·o dipet iako ta·rake ong·atna miksongani dongja ineba Khliehriat-ni MLA aganaha.
Meghalaya a·dokona rel garirangko ra·napbagenchimode niam gri napsrukanirangko champengna neng·gnok ine dingtang dingtang dolrang raken jegalsotokengachim ine nikna man·a.
Da·o dipet rel gariko Garo Hills-ona ra·baahaoba Khasi-Jaintia Hills a·jarangode rel garirangko dingtang dingtang dolrang raken jegalsotokkuengachim.