U·IATTIMGIPAONI
SHILLONG: Scholarship-ni tangka paisarangko ma·mong sorkarini Minority Affairs Ministry watatkujaengani a·sel chatro chatrirangna scholarship-rangko on·na man·kujaenga ine Sukrobar salo, a·dokni Education Minister Rakkam A Sangma parakataha.
Sukrobar salo KSU-ni dilgiparangko grongani ja·man kobor ra·timgiparangna talataniko on·angengon, chatro chatrirangni scholarship-rangko on·na man·na gita a·dok sorkari, Minority Affairs Ministry-oniko skanggipa instalment-na sengkuenga aro da·o adita salrangni gisepon tangka paisarang sokbana ka·dongenga ine Sangma parakataha.
Meghalaya sorkarini gitade, scholarship-ni pilak kamrangkon matchotmanahachim ineba Sangma aganaha.
A·dok sorkario je tangka paisarang donga, ua tangka paisarangchin chatro chatrirangni account-rango chipatna a·bachenggnok ineba Education Minister parakataha.
Chatro chatrirangni scholarship-rangko da·onan on·kujaengani gimin Khasi Students Union (KSU)-ni assistant education secretary Shelkitbok Kharbani, suk ong·gijaniko parakatskaaha.
“November 21 tarikoni a·bachenge antigni gisepon chatro chatrirangni scholarship-rangko watatgnok ine a·dokni Education Minister, songbadrango parakatahachim indiba chinga am·sandie nion da·ona kingkingan chatro chatrirang scholarship-rangko man·tokkujaenga ine ma·sina man·aha. Scholarship-rangko man·tokkujaengani a·selan chatro chatrirang neng·nikanirangko chagrongna nangtokengaha,” ine Kharbani parakataha.
Kharbani-ni aganani gitade, chatro chatrirang bang·batan an·tangtangni college fee, lekka ki·tap aro gipin kamrangna scholarship-rangon pangchaktokengachim indiba ia bilsini scholarship-ko man·tokkujaengani a·sel chatro chatrirang namen neng·nikanirangko chagrongna nangtokengahachim.