Shillong – Martin Luther Christian University, ka·sachake dakchakna tangka gilaniko ong·ataniaro Advance Christmas 2023-ko December 2-o maniangani chu·sokgipa ong·a, ine kusi ong·e parakataha. Ua event-o bang·a dakchakanirangko man·aha, aro tangka 1,87,530/- ko ka·sae on·gilaniko man·aha, jekon Manipur-o namgija obostako chagronge dongenggiparangna dakchakatgen. Dakchakanirangra tangka chisan ong·aija, indiba una agreba dingtang dingtang dakchakanirangkoba on·ataha, uno gamchatgipa bosturang jekai ge-12 box-rang gapile aro bosta 4 ding·a ba·rarang, ge-24 nokdangni manderangna mi·dik samdikrang, ge-100 wagam natani brush-rang, ge-100 a·wani saboon-rang, king 50 noksa salani ki·taprang aro rong nongani pencil-rang, ge-400 ba·ra su·ani saboon-rang, packet 315 juice-rang, rool 282 toilet paper-rang, ge-150 packet-ni sanitary pad-rang, packet 30 sweet-rang aro dingtang dingtang grocery bosturangko manderang on·gilaha. King 200 kombolrang-ko aro mitam-rangko tanka on·gilanichi ra·aha, uamang on·gile man·gipa gimik bosturangko Manipur-chi on·atgen, jean sing·karini somoio bang·bea dakchakanirangko on·gen. Ia gamchatgipa on·gilako man·gipa bosturangko December 8, 2023-o Manipur-chi watatgen, aro Manipur-ni bang·a relief camp-rangchi on·atgen. Ia nikna man·gipa bosturangko jinma manderangni apsan melie ka·sae on·gile dakchakanichi chu·sokna man·aha. Martin Luther Christian University, indake ka·sae on·gilatgipa manderangko uamamgni ka·sako mesokanina mitelaha. University indake on·gile dakchakaniko dakanira gipinrangna ja·rikchina ka·dongani ong·gen, aro jinma manderang apsan melie mande skana ka·saniko mesokna mikkangchiba ka·dongsoenga.
