U·IATTIMGIPAONI
TURA: South Garo Hills a·jani Krishi Vigyan Kendra (KVK)-o kamko ka·enggipa sakbonga manderang, Chokpot-o game ge·e cha·enggipa manderang baksa re·anggipa December 12 tarikoni 14 tarikona Nagaland a·dokni Chumukedima-o ong·atanggipa State Agri Expo-o bakko ra·eaha.
Ia Agri Fair-ko Imphal-o donggipa DEE CAU-ni gita ong·atangaha aro ia program-o bakko ra·egipa South Garo Hills KVK-ni official-rangara, SGH KVK-ni Head aro Principal Scientist Dr Athokpam Haribhushan, SMS Horticulture Basu Langpoklakpam, Bishrojit Ningthoujam aro gipin sakgni manderang ong·a.
Ia Agri Expo-ko ong·atanio SGH KVK-o kam ka·enggipa manderang, South Garo Hills a·jao gamgipa ge·gipa me·su samjakrang, bolam biterang aro dingtang dingtang self help group (SHG)-rangni tarigipa bosturangkoba mesokbana cholko man·aha.
Ia program-ko ong·atanio South Garo Hills a·jani KVK-na dingtangmancha vegetable show-ni consolation prize-koba on·aha.
Ia Agri Expo-ni bon·kamgipa program-ko December-ni 14 tariko ong·ataha aro ia program-o Imphal CAU-ni Chancellor Prof Pradeep Kumar Joshi, mongsonggipa sokgipa ong·e bakko ra·angaha.