U·IATTIMGIPAONI
WILLIAMNAGAR: Mijal Sonibar salo Williamnagar Rongrenggre Govt. Higher Secondary bakrao salgnina ong·atgipa Simsang Festival 2023-ni bon·kam-gipa salo Meghalaya sorkarini PHE, Soil aro Water Conservation, Housing, unagreba gipin department-rangni Minister Marcuise N Marak chief guest ong·e dongpae festival-ko rasong mikkim chaataha.
Festival-ni tom·ao aganao jedake kal·susaani-rang, wata-chenga-sola-repa uandake dingtang dingtang jaktangchi tariani-rangko, git ringsulsalani unagreba gipin gipin bang·a bakrango joltangni manderangni aro artisan-rangni changa-sapani-rangko aro u·i-ma·siani-rangko mesokna aro mikkangchi re·bachina chadamberangko didina miksonge festival-ko ong·atenga aro indakgipa rokomni festival-rangchi uamangna cholrangko on·enga. Changa-sapani gnanggipa chadamberang uamangni changa-sapani-rangko aro u·i-ma·sianiko mesokna man·gen chol-rangko aro ga·timrarangko ra·bana sorkari jotton ka·enga, ua u·iataha.
East Garo Hills-ni Deputy Commissioner, Vibhor Aggarwal rimchaksoani kattarangko aganao festival-ni mingsingani aro bakko ra·giparang bilsianti batrorobaengaha ine aganaha.
Tom·ao chief guest ong·e Lakhpati Didi scheme-ni ning·o NRLM-rangna aro Self Helf Group-rangna tangkani cheque-rangko suale on·angaha.
Games aro sport-rango susaanirang, git ringanirang, chrok-mesaanirang, songa-chananirang aro Riprap, Nokpante, Do·pos unagreba gipin gita bang·a dingtang dingtang music band-rangchi bakko ra·anirang baksa Festival-ko matchotataha.