U·IATTIMGIPAONI
SHILLONG: Kamoni neng·tanggimin skigiparangna pension aro death-cum-retirement gratuity (DCRG)-ko bariatchina gita Meghalaya Retired Deficit Teachers Association (MRDTA), a·dok sorkario dabiangaha.
Sonibar salo tom·aniko ong·atani ja·man kobor ra·timgipa manderangna talate on·angengon, 2017 bilsini January 1 tarikoni 2022 bilsini March 31 tarikni gisepo kamoni neng·takanggipa deficit skigiparangna sorkari, DCRG-ko bariatna tik ka·ahaoba 2017 bilsina skang aro 2022 bilsini ja·man kamoni neng·takangenggipa skigiparangnade DCRG-ko bariatna tik ka·kujaengani gimin uamang, a·dok sorkarina sedoatna tik ka·angaha ine MRDTA-ni president ED Nongsiang parakataha.
Iana skangba uamang, baditaba changa a·dok sorkarina memorandum-rangko on·atmanahachim indiba da·alonan iani bidingo maming aganchakanirang dongkujaenga ineba ua aganaha.
“Meghalaya a·doko sorkari ong·gijagipa deficit skulrangna pension-ni draft scheme donga aro teachers employees rule 2023 donga. Iako Education department-ni gitaba parakatmanahachim indiba da·o dipet iako sorkari ra·chakkujaenga,” ine MRDTA-ni president aganaha.
Nongsiang-ni parakatani gitade, iani bidingo association-ni dilgiparang, chief minister-ko gronge agangrikon, iani bidingo sorkari officer-rangko grongchina gitasa uamangko chief minister aganskaahachim.
“Chief minister an·tangan deficit skulrango skigiparang ong·e chingaba pension-ko man·na kragiparang ong·a ine aganahani gimin chinga ia dabianiko chu·sokatchina sorkariko didienga,” ine MRDTA-ni president aganaha.