U·IATTIMGIPAONI
TURA: Meghalaya sorkarini ning·o kam ka·enggiparangnade December jani dormahako Krismasna skang on·ahaoba 4th teacher-rangnade dormahako on·jaengani a·sel Krismasko manianio neng·nikanirangko chagrongna nangtokenga ine All Meghalaya 4th Teachers Association (AM4thTA) Garo Hills unit, suk ong·gijaniko parakataha.
December jani dormahako Krismasna skang on·jaengani gimin suk ong·gijaniko parakatengon, “Krismasara Kristian sakantinan mongsonggipa maniani ong·a ine darangan ma·sia aro Krismasni somoio dedrangna chola ba·ra, nokni nanganirang aro cha·ani ringanirangko brena gita tangka paisarangko nangchongmota indiba 4th teacher-rangnade ia Krismasna December jani dormahako on·jaengani a·sel skigiparang, maming koros grisa Krismasko manina nangtokenga,” ine AM4thTA GHU-ni president Tengsrang K Sangma parakataha.
Meghalaya sorkario kam ka·enggipa manderangna sorkari, December jani dormahako Krismasna skang on·na man·enga ong·ode skigiparangnaba apsan daken Krismasna skang on·na nanga ineba ua dabiangaha.