U·IATTIMGIPAONI
SHILLONG: 2018 bilsion Assembly-o resolution-ko pass ka·ahaoba da·alonan Khasi aro Garo ku·sikrangko Constitution-ni Eighth Schedule-o chapatna gita ma·mong sorkariko didina man·jaengani gimin a·dok sorkariko Congress matnangataha.
“Khasi aro Garo ku·sikrangko Eighth Schedule-o chapatchina dabina gita 2018 bilsini September jaon Assembly-o resolution-ko pass ka·ahani gimin ian sorkarini simsakgijanisa ong·enga ine an·chinga aganna man·gen. Assembly-o sak 60 membor-rangni namnikani gitan sorkari resolution-ko pass ka·ahani gimin ian ramram resolution ra·ani ong·jahachim. Membor-rang pilakan ia ra·chake vote-ko on·tokahachim,” ine Congress dolni dilgipa aro Opposition dolni Chief Whip Saleng A Sangma aganaha.
Khasi aro Garo ku·sikrangko Eighth Schedule-o chapatchina dabianiara namen nangchongmotgipa dabiani ong·ani gimin sorkari, ia resolution-ko ra·ani bidingo ma·mong sorkari baksa agangriktaitaina nangachim ineba ua aganaha.
Sangma-ni aganani gitade, Meghalaya a·dokni chatro chatrirangba competitive exam-rango ku·tangtangchi sena man·genchimode porikkarangko seanio altubatgenchim.
Parliament-o resolution-ko pass ka·ataniara a·dok sorkarini daitoan ong·achim ine janapatengon, “Iani bidingo Khasi Authors Society ba A·chik Literature Society Delhi-ona re·ange jingjengatanirangko dakna nangani katta dongjachim maina ian nangchongmotgipa kam ong·ani giminsa Assembly-oba resolution-ko pass ka·ahachim,” ine Congress MLA aganaha.