U·IATTIMGIPAONI
TURA: Bristibar salo, Tura-ni MP Agatha K Sangma, Tura-ni DRDA Conference Hall-o Pre-Christmas program-ko ong·atanio bak ra·angenba, Tura jillako nitoatna gita dingtang dingtang gittimni development committee-rangna cheque-rangko suale on·angjolaha.
Re·baenggipa bilsini January jao Meghalaya Games-ko Tura-o sokachakengani gimin Tura jillani dingtang dingtang gittimrangko nitoatsamsona gita ia cheque-rangko, dingtang dingtang gittimrangna sualataha.
2019 bilsio A·chik Baptist Dal·gipa Krima (ABDK) sobako Tura sokachakanio manderangni gittimtangtangko aro ramarangko tarie nitoataniko gisik ra·atpilangengon, ua somoio manderangni ku·cholsan ong·e Tura jillako nitoataniko nike a·dokni Chief Minister Conrad K Sangma, da·o Tura-o sokachakna sienggipa Meghalaya Games-naba apsan daken Tura jillani dingtang dingtang gittimrangko nitoatna nangnikaha ine Tura-ni MP parakataha.
Sorkarini project-chi Tura jillako nitoatani bidingo janapatengon, ia sal somoirango Tura jillani pilak biaprangon dingtanganirangko nikna man·engaha ine Sangma, ia kamo sorkari baksa bakrimangkuchina Tura jillao songdongenggipa manderangko didiataha.
Krismasni salrang sokbaahaon manderangni namgnina kamrangko ka·engani gimin ua dingtangmancha West Garo Hills a·jani Deputy Commissioner Jagdish Chelani aro Superintendent of Police (SP) Abraham T Sangma-koba mittelpilangaha.
Ia tom·anio, Tura Municipal Board-ni Chief Executive Officer Rikse R Marak-ba jinmana aganprakengon, 2021 bilsini Beautification Project-ni bidingo report-ko on·angenba, ia project-ni skanggipa bako dol 78 gittimrang bakko ra·angaha ine parakataha.
Ia tom·anio, dol 48 area development committee-rangna gong lak 1, dol 47 area development committee-rangna gong lak 50 aro Tura jillani dam 10 bibrarang (junction)-rang, chong·motan Ringrey junction, Gandrak Dare Junction, Chandmary junction, Hawakhana junction, Araimile junction, Noksik Gittim (Proper Chandmary) junction, Proper Chitoktak junction, Walbakgre junction, Akimbri junction aro William Point junction-ko nitoatna gita gong lak 10-ni cheque-ko TMB-ni CEO-na Tura-ni MP pakwate on·angaha.