SHILLONG: MasterChef India Season 8-o skang-gipa runners-up-ko chegipa Meghalaya-ni Nambie Jessica Marak, jekon tribalchef ineba mingachim, ua songni me·chikrangna dakchakna gita tangkachi bilakna kam ka·enga.
“Angni YouTube channel ‘Eat Your Kappa’ dongaha, jeon anga Norteast India-ni dingtang dingtang cha·ringarangni aro daka rikarangni gimin golpoaha,” ine Nambie aganaha.
“Iana agreba anga, noktango dingtang ding-tang pickles ba achar-rangko tariaha, aro uko India aro gipin a·songni dingtang dingtang biap-rangona watataha. Da·o dipetde ia acharrangko Singapore, Paris, USA-oni bi·ataha aro da·o anga maidake angni acharrangko tarianiko bariatrorona man·gen, uni gimin cholrangko sandienga, aro maidake angni tarigiminko gipin a·songona sokatna man·gen, uni gimin chanchienga,” ine Nambie aganaha.
Angni miksonganira songni me·chikrangko ia bading chiwalonio mang-rakatani ong·enga,” jen somoio anga bading chiwalna accharrangko taria, unon angni songni me·chikrangko okamataha, jedakode uamangna taria-niko skie ra·e an·tang-tangni janggi tanganina tangka kamaina man·gen. Anga da·o runner-up ong·e matchotani ja·man bading chiwalanirangko dakna bang·a cholrangko man·aha, ine ka·dongna man·aha.”
Nitotalaigipa wilwil aro diltugipa songadam Upper Rangsa (Boko-oni km 30 chela) jean Meghalaya-ni West Khasi Hills (WKH), 33 Rambrai-Jyrngam Legislative Assembly constitution-ni ning·ao ga·aka, aro Assam-Megha-laya sima ario ga·akgipa songo donggipa Nambie Jessica Marak, uni songa rama jalangrang namjani gimin namen duk ong·aha.
“Maming jeanigrian agana, namen rake kam ka·a, aro da·alo anga, India-na aro A·gilsakna, angni a·dok Meghalaya aro North East India-ni cha·a ringani gimin aganna namen rasong gnange nikaha,” ine Nambie agandapaha.
“Anga city-ni me·chik ong·a, anga Shillong-on atchia aro dal·aha, anga gipin biaprangoba poraiaha, indiba bon·kamo anga gimikkon watbaha. Anga angni songona re·bapilaha aro nokdangni manderang baksa janggi tangaha. Indiba anga angni songko dal·begipa gadangni gita u·iatna man·aha,” ine Nambie agandapaha.
“Da·alo chingni songko India a·song gimikkon ma·siatna man·ani gimin chingni songni manderang ango rasong man·chakaha, anga uni gimin an·tangko namen rasong gnange nikaha,” ine Nambie Athiabari songo mande ra·aniko dakani somoio aganaha.
“Meghalaya ba North East-ni cha·ani ringanirang, gipin India aro gipin a·songrang baksa namen dingtanggipa ong·aha, indiba anga chingni cha·a ringanirangko mesokna man·ani gimin namen rasong gnange nikaha,” ine Nambie agandapaha.
MasterChef of India-o skanggipa runners-up-ko man·ani ja·man, Nambie-ko program ‘Viksit Bharat Sankalpa Yatra’-o bak ra·echina okamataha, jean ma·mong sorkarini scheme ong·aha, aro ua program-kora Bristibar attam-o Assam, Meghalaya sima arini WKH District-o ga·akgipa Athyibari songo ong·ataha.
Rambrai Jyngram constituency-ni MLA, R G Momin, ADC WKH District B Swer, Mawsynrut Block Development Officer R Kharkongor, baksana gipin official-rang aro mande ra·ako man·na kragiparang ua program-o mongsonggipa sokgipa ong·e bak ra·aha.
Jensomoio program-ko ong·atgipa biapona Nambi Marak sokaha, unon pilak manderang namen kusi ong·sotokaha. Nambie-ko mongsonggipa sokgiparang aro ua songni manderang mande ra·a gnang rimchaksoaha.