Shillong: Nongpoh-ni UDP MDC, Balajied Ranee, Khasi Hills Autonomous District (Khasi Social Custom of Lineage) (Amendment) Bill, 2023 jekon house-o passed ka·e Governor-oniko ra·chakako sengengachim, uko ta·rake kam ka·china NPP-ni dilgipa EC-o mol·molaha.
Iani bidingo kobor ra·timgiparang baksa golpoanio, Ranee agana, Ri Bhoi-ni mitam biaprango daka rikarang jekon “Ring Bia ba Shaw Bhoi” ine mingahachim, uko amendment bill-o donani gimin kusi ong·chakaha, jekon ru·uta somoionin dondipate donahachim.
“Da·o Ri-Bhoi-ni manderang jemangan customary practice-ko jakalahachim, uamang da·o Khasi tribe certificate-ko man·na kragipa ong·aha, jekon ru·uta somoionin champengate donaha-chim,” ine Nongpoh-ni UDP MDC aganaha.
Amendment bill jekon Sukrobaro winter session-ni bon·kamgipa salo passed ka·ahachim, uno indine agana, “Ring Bia ba Shaw Bhoi” ni orto customary practice ba skangonin Khasi maharirangoni Ri-Bhoi district-o daka rikbagipa ong·achim, jeon Duh Iing-ni mamlao, Khasi nokdangni me·asarang Khasi jat ong·gijagipa me·chikko bia ka·genchimode unon me·asani mahari ra·chakna nanggen, jean kpoh-ni namnikani gita ong·na nanggen, jekon Kur ra·chakaha.
Apsan somoio Ranee agana, skanggipa sal dipetan “Ring Bia or Shaw Bhoi” ko ra·chakchina mol·molaha.
Ua agandapa, uamang Mawhati-ni Congress MDC Charles Marngar jean da·omitingo Council-ni Deputy Chairman ong·a unbaksa apsan melie iani bidingo sing·anirangko dakaha.
“Chinga iani bidingo house-o bang·a changon jera ra·grikaha. Indiba ua gimik changon iani gimin maming namgniko man·jahachim,” ine Nongpoh-ni UDP MDC aganaha.
