SHILLONG: Ma·mongo Congress aro Trinamool Congress dolgnian opposition Indian National Developmental Inclusive Alliance (INDIA)-ni bak ong·engoba, re·baenggipa 2024 bilsio ong·atna sienggipa Lok Sabha election-na Meghalaya a·doko ia dolgnian seat-rangko sualgrikani bidingo chanchirima dongskakujaenga.
Meghalaya Pradesh Congress Committee (MPCC)-ni president Vincent H Pala-ni u·iatani gitade, da·o dipet Lok Sabha election-na Congress aro TMC-ni gisepo seat-rangko sualgrikani bidingo chanchirima dongkuja aro high command-ni gita nangnikani donggenchimosa ia dolgnini gisepo seat-rangko sualgrikani bidingo chanchirimnaba gnang.
“Da·o dipet chinga dolgnini gisepo maming chanchirima dongkuja aro ma·mongni dilgiparang nangnikgenchimosa chingni gisepo chanchirimanirangko daknaba gnang,” ine Pala aganaha.
Apsan daken TMC-ni state president Charles Pyngrope-ba da·o dipet high command-oni iani bidingo maming u·iatanirang dongkuja ine parakataha.
Re·baenggipa 2024 bilsini Lok Sabha election-na INDIA-o bak ong·enggipa dolrang, ta·raken seat-rangko sualgrikna tik ka·angahachim ine nikna man·a.
INDIA political dolrangni brigipa tom·anio Congress dol, seat sualgrikaniko January jani gnigipa antio matchotatna tik ka·angahachim indiba TMC-de seat sualgrike songgigrikaniko December 31 tarikni gisepo matchotatna aganskaahachim.
