U·IATTIMGIPAONI
SHILLONG: Garo Hills Autonomous District Council (GHADC)-o da·o ong·enggipa NPP MLA-ni tangka jakkalsretaniko parakahani gimin a·dok sorkari, Lokayukta-ni Investigation Officer sakgittamko Whatsapp message gita kam ra·galataha ine matnangataha.
Koborko on·ani gitade, ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Ia official sakgittamko ra·galani bidingo badi ka·doanggipa Kingstone B Sangma-ni parakatani gitade, Lokayukta-ni official-rangko sorkari, iandake kamoniko ra·galna man·jachim indiba GHADC-ni MDC hostel-ko rikanio tangka paisarangko jakkalsretgipa Mahendraganj-ni NPP MLA Sanjay A Sangma-ko jokatna gitasa sorkari, ia official-rangko ra·galdraaha.
Matnangako man·enggipa MLA Sanjay A Sangma-ra, a·dokni Chief Minister Conrad K Sangma-ni boningtang ong·achim ine nikna man·a.
Kingstone-ni matnangatani gitade, Mahendraganj MLA-ni kosako District Special Session Court-o bichal ka·engkua aro Lokayukta-ni official sakgittamko a·dok sorkari, GHADC-ni documentary project-ko tarina gita chame on·gipa gong kror 5.82 tangkarangko jakkalsretahani gimin saksa Twinkle Newar-ni kosako inquiry-ko dakengani giminsa uko jokatna gita ra·galaha.
“Ia sorkarina chakgipa manderangkosa uamang jokatna jotton ka·enga,” ine Kingstone parakataha.
Kingstone-ni parakatani gitade, Lokayukta-ni official-rangko kamo songahaon bilsi bongana office-o donna nanga ine niaman dongani gimin sorkari, ia official-rangko skatang ra·galna bil dongjachim.
Indake ong·engon, ia official sakgittamko ra·galaniara maming dakeba GHADC-o tangka paisa jakkalsretani baksa nangeani dongja ine Lokayukta-ni senior official saksa talataniko on·angskaaha.
Ia official-ni talatani gitade, ia official sakgittamni kamrangara, Meghalaya Lokayukta Act 2014-ni ning·o dongimin niamrangni kosako ong·engani giminsa ia official sakgittamko kamoniko ra·galaha. Meghalaya Lokayukta Act 2014-ni ning·o dongimin niam gitade, je officer-rangan sorkarini kamo ong·kuengachim, uandakgipa officer-rangkosa Lokayukta-ni investigation official dake seokna man·a indiba ia sakgittam official-rangara kamoni neng·takgimin officer-rangsa ong·achim ineba ua aganaha.