SHILLONG: 2023 bilsi re·angaha aro da·o an·ching gital 2024 bilsio ga·tapahaon, dingtang dingtang political dolrangba dingtang dingtang kamrangko ka·na miksonganirangko paraktokaha.
Meghalaya a·doko sorkariko dilenggipa National People’s Party (NPP)-ni dakna miksonganirangko niatgenchimode, uamang ia gital bilsioba a·dokni manderangna nambate dangdike on·angkuna ku·rachakaniko on·angaha.
“Sorkari ong·e chinga gital 2024 bilsio a·dokni manderangna nambate dangdike on·na ka·dongsoenga. Batanggimin bilsirango Chief Minister Conrad K Sangma-ni dilanichi chinga a·dokni manderangna name dangdike on·na jotton ka·aha aro ia gital bilsioba a·doko songdongenggipa pilak manderangni neng·nikanirangko namatna aro nanganirangko chu·sokate on·na an·tangtangko on·kangenga,” ine NPP-ni dilgipa Marcuise N Marak parakataha.
A·doko songdongenggipa manderangni namgnina aro an·tangtangni constituency-rango songdongenggipa manderangna chu·ongnikaniko on·anian a·dok sorkarini mongsonggipa daito ong·gen ineba ua aganaha.
Meghalaya a·doko songdongenggipa manderangni dingtang dingtang nanganirangna ku·rang on·ani aro kamrangko ka·anian United Democratic Party (UDP)-ni miksongani ong·enga ine UDP-ni general secretary Jemino Mawthoh parakatskaaha.
“UDP-ba APHLC-oni ong·katbagipa dolan ong·ani gimin ia gital bilsioba chinga a·doko songdongenggipa manderangni nanganirangko chu·sokate on·na kamrangko ka·angkugen,” ine ua aganaha.
“2023 bilsini Assembly election-o aro ADC election-o seat-rangko bariatna man·ahani gimin da·o onbatgipa gadangonin party-ko mangrakbatatna gita chinga krengenga aro ia 2024 bilsini Lok Sabha aro District Council election-oba chena ka·dongenga,” ine Mawthoh aganaha.
Mawthoh-ni aganani gitade, UDP-ba MDA sorkarini mongsonggipa bak ong·e a·doko namroro silroroaniko ra·baanio pilak nanga dakchakanirangko sorkarina on·angkugen aro dingtang dingtang ra·bianirang donggenchimoba a·dokni manderangna dangdike on·angkugen.
Indake ong·engon, ia gital 2024 bilsio BJP dolba, ma·mong sorkarini ra·gate on·gipa scheme-rangko a·dokni kitikbrionan sokate on·na kamko ka·gen ine parakatskaaha.
“Ia gital bilsio BJP-ni political resolution-de Viksit Bharat campaign-chi a·songni Prime Minister Narendra Modi-ni dingtang dingtang scheme-rangko manderangona sokate on·anian ong·enga,” ine BJP-ni spokesperson M Kharkrang parakataha.
Opposition aro Congress dolni dilgipa Ronnie V Lyngdoh-ba a·dokni manderangna uamangni man·na nangenggipa bilrangko on·na miksongenga ine parakataha.
“A·doko songdongenggipa manderangna namroro silroroani, dingtang dingtang jat aro toromni gisepo meli-nangrime donganiko ra·baanian chingni mongsonggipa miksonganirang ong·enga,” ine Lyngdoh aganaha.
A·doko tangka paisa jakkalsretani grigipa sorkariko ong·atani aro dingtang dingtang nanganirangko sorkarina ku·rang on·anian Voice of the People’s Party (VPP)-ni miksongani ong·enga ine parakatskaaha.
“Chinga (VPP) MDA sorkarini tangka paisa jakkalsretaniko bon·atna kam ka·gen. Ia sorkari pilak niamrangko pe·e tangka paisarangko jakkalsretenggipa sorkari ong·a ine pilakan ma·sienga. Uni gimin namgipa a·dok sorkariko ong·atanian chingni miksongani ong·enga,” ine VPP-ni spokesperson Batskhem Myrboh aganaha.
Trinamool Congress (TMC)-ni dilgipa George B Lyngdoh, ia gital 2024 bilsini namgipa skaniko a·doko songdongenggipa manderangna on·atengon, “Ia gital 2024 bilsi a·dokna aro a·songni manderangna pattianiko ra·bachina aro da·o chinga Lok Sabha election-na re·mikkangengon, manderang an·tangtangni u·i-ma·sianirangko jakkale manderangni namgnina kam ka·gipa, dingtang dingtang jat aro toromko mande ra·gipa sorkariko seokgen ine chinga ka·dongenga,” ine parakataha.