SHILLONG: Gital ra·gatna sienggipa Bharatiya Nyaya Sanhita (BNS)-ni ning·o manderangko salgake katgiparangna sastirangko bariatengani gimin jegale, January 5 tarikoni tourist taxi-rangko salenggiparang Meghalaya a·dokoba dontongatnaba gnang.
Gital ra·gatna sienggipa Bharatiya Nyaya Sanhita (BNS)-ni ning·o, manderangko salgake katgiparangna sastiko bariatna tik ka·engani gimin a·song gimikon tourist taxi-rangko salenggiparang jegale gari para salruraaniko dontongatengani gimin Meghalaya a·dokoba apsan daken tourist taxi-ko salenggipa manderang jingjengatanirangko dakna miksongenga.
Koborko on·ani gitade, Meghalaya a·dokoba tourist taxi-ko salenggipa dingtang dingtang dolrangko ia jingjengatanio bak ra·china gita Guwahati-o tourist taxi-ko salenggipa dolrang didiataha.
Iani bidingo kobor ra·timgiparangna talataniko on·angengon, gital ra·gatgipa sienggipa BNS-ni ning·o salgake katgiparangna sastiko bariatna tik ka·ahani gimin jegale, Assam a·doko para salenggipa garirang January 5 tarik pring 5 bajioni January 6 tarikona dontongatna tik ka·aha ine Greater Guwahati Tourist Taxi Association-ni president Rabin Dutta, una u·iataha aro uamangba ia jingjengatanio bak ra·na ku·rachakataha ine Khasi Hills Tourist Taxi Association-ni general secretary Bhaskar Deb parakataha.
“Gong lak 10 dai baksana pattoko chipatna sorkari miksongenga indide sawa para sale cha·na sikgen?” ine Deb sing·doataha.