SHILLONG: Meghalaya a·doko niam gri napsrukanirangko champengna gita ‘technology’ ba gital kolrangko jakkalchina gita Congress dol, sorkarina ku·pattianiko on·angaha.
Meghalaya a·doko niam gri napsrukanirangko champengna man·na gita Inner Line Permit (ILP)-ko ra·gate on·china a·dokni dingtang dingtang dolrang aro a·dok sorkariba dabiengachim ine nikna man·a.
ILP-ko dabina gita Meghalaya Assembly, 2019 bilsion resolution-koba pass ka·ahachim.
Iani bidingo kobor ra·timgipa manderang baksa agangrikengon, a·dokona re·napbaaniko aro re·ongkataniko nirokna gita technology-rangko jakkalgenchimode, a·dokni dingtang dingtang biaprango check gate-rangko songanioba maming neng·nikanirang dongjawachim ine Meghalaya Pradesh Congress Committee (MPCC)-ni president aro Shillong Lok Sabha-ni MP Vincent H Pala parakataha.
A·doko check gate-rangko songanio ma·mong sorkarini jegalengani gimin Pala, ia kattarangko aganaha.
“Gital kolrang (technology)-rangko niatgenchimode check gate-rangko chalaianio maming neng·nikanirang dongna nangjachim. Meghalaya a·doko an·ching pilak biaprangon check gate-rangde donga indiba maikai manderangni re·ruraanirangko name nirokna man·gen? Da·alo an·chingni national highway ramarango hajalni hajal truck garirang re·ruraenga, iarangko maikai manderangni bilchi nirokna man·gen? Uni gimin an·chingni check gate-rango ia gital kolrangko jakkalgenchimode, an·ching manderangni re·baani aro re·ongkatanganirangko nambate nirokna man·genchim,” ine ua aganaha.
Parliament-rango jekai re·napbaenggipa aro re·ongkatangenggipa manderangni mikkangrangko ma·sina gita kolrangko jakkalachim, apsan daken check gate-rangoba iandakgipa kolrangko jakkalna nangengani gimin MPCC-ni president, ku·pattianiko on·ataha.
“An·ching gipin a·songrangona re·angode an·chingna visa-rangko on·a aro iade an·ching mandeko ‘check’ ka·gipa ong·ja. Apsan daken, ILP ba uandakgipa gipin bill-rangoba, technology-ko jakkalgenchimode, maming neng·nikani grian manderangni re·ruraanirangko nambate nirokna man·aigen,” ine Pala aganaha.
Meghalaya Residents Safety & Security (MRSSSA)-ni bidingo an·tangni chanchianiko janapatskaengon, ia Act-ni mongsonggipa niamrangko sorkari nipiltaienba, taridapna nanganirangko taridapna nanga ine Pala aganaha.