SHILLONG: Kamoniko ra·gala man·gipa Lokayukta-ni official sakgittamko kamo ra·pilchina gita dabie Voice of the People’s Party (VPP), NPP-chi dilenggipa MDA sorkarini kosako jingjengatanirangko dakna ka·mikkenataniko on·angaha.
Lokayukta-ni office-ara jakgitelgipa aro kenani gri ong·gipasa ong·na nangani gimin Lokayukta-ni kamrango jak on·pajachina gitaba VPP, a·dokni Chief Minister Conrad K Sangma-ko mikrakataha.
VPP-ni president Ardent Miller Basaiawmoit-ni parakatani gitade, Chief Minister-ni bak nanggipa mandeko man·chape tangka paisarangko jakkalsretanio jak donggipa manderangko jokatna gitasa Lokayukta-ni investigating officer sakgittamko MDA sorkari, kamoniko ra·galataha aro iako a·dokni manderang pilakan jegalgrimna gita nangchongmota.
“Kamoniko ra·gala man·gipa Lokayukta-ni officer-rangko kamo ra·piljagenchimode VPP, NPP-chi dilenggipa MDA sorkarini tangka jakkalsretaniko jegalna gita ramarangona re·ange jingjengatna draatako man·gen,” ine Basaiawmoit parakataha.
“Meghalaya a·doko songdongenggipa manderangna tangka paisa jakkalsretani grigipa a·dokko aro namgipa sorkarikosa nanga. Chinga manderangni namgnina kamko ka·enggipa opposition dol ong·e, sorkarini iandakgipa kamrangko nie dongchajawa,” ineba ua parakataha.
Garo Hills Autonomous District Council (GHADC)-o da·o ong·enggipa NPP MLA-ni tangka jakkalsretaniko parakahani gimin a·dok sorkari, Lokayukta-ni Investigation Officer sakgittamko Whatsapp message gita kam ra·galatahachim ine nikna man·a.
Ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Ia official sakgittamko ra·galani bidingo badi ka·doanggipa Kingstone B Sangma-ni parakatani gitade, Lokayukta-ni official-rangko sorkari, iandake kamoniko ra·galna man·jachim indiba GHADC-ni MDC hostel-ko rikanio tangka paisarangko jakkalsretgipa Mahendraganj-ni NPP MLA Sanjay A Sangma-ko jokatna gitasa sorkari, ia official-rangko ra·galdraahachim.
Matnangako man·enggipa MLA Sanjay A Sangma-ra, a·dokni Chief Minister Conrad K Sangma-ni boningtang ong·achim ine nikna man·a.
Kingstone-ni matnangatani gitade, Mahendraganj MLA-ni kosako District Special Session Court-o bichal ka·engkua aro Lokayukta-ni official sakgittamko a·dok sorkari, GHADC-ni documentary project-ko tarina gita chame on·gipa gong kror 5.82 tangkarangko jakkalsretahani gimin saksa Twinkle Newar-ni kosako inquiry-ko dakengani giminsa uko jokatna gita ra·galahachim.
Indake ong·engon, ia official-rangko kamoniko ra·galatani ja·man a·dok sorkari, Lokayukta-ni investigation officer sakbriko uamangni biapo ra·skaaha ine kobor on·aha.
Koborko on·ani gitade, a·dok sorkarini ge·etaniko man·e Israel Ingty-ko Inquiry Wing-ni Director aro gipin sakbri official-rangko Lokayukta-ni membor dake Lokayukta-ni Chairperson Bhalang Dhar songe on·angaha.