SHILLONG: Meghalaya a·doko bijoli man·aniko nambatatna gita Meghalaya sorkarini Power department, ONGC Tripura (OTPC) baksa Memorandum of Understanding (MoU)-o soi ka·grikangaha aro ia soi ka·grikanio a·dokni Power Minister AT Mondal-ba dongpaaha.
Power department aro OTPC-ni MoU-o soi ka·grikanio, Power department-ni Commissioner & Secretary Sanjay Goyal aro OTPC-ni Managing Director Sanil Namboodiripad-ba dongpae bak ra·angaha.
Ia bilsigittamna MoU-o soi ka·grikaniko a·dokni Power department aro OTPC, a·doko bijoli bikotani cholrangko ra·na gita songgigrikangaha.
Power department aro OTPC-ni MoU-o soi ka·grikaniara a·doko bijoli bikotaniko namdapatna ja·ku de·chakatani ong·aha ine janapatengon, ian a·doko bijoli nanganirangko chu·sokatna ja·ku de·anisan ong·aigija bijoli jakkalanio aro samtangtango ong·telaigiparangko rakkianio simsake ja·ku de·na songgigrikaniba ong·aha ine a·dokni Power Minister AT Mondal parakataha.