TURA: West Garo Hills a·jani a·kawe jolo donggipa Anti Corruption Foundation of India (ACFI)-ni general secretary Atikul Islam, Budbar attamo Hatsingimari bazaar-oni gimaangani ja·man uko ita so·gipa karkanani nokgiparangsa rim·gittangaha ine matnangenba ACFI-ni membor-rang, Hallidayganj police station-o FIR ka·doangaha.
FIR-o ACFI-ni dilgipa Billal Hossain-ni badi ka·doangani gitade, uamangni general secretary Atikul Islam, Budbar attamni 8:00 bajimango, Hatsingimari bazaar-ona re·angahachim indiba ua nokona sokangpiljaha.
Niam gri ita so·gipa karkanarangko chalaienganina badi ka·ahani gimin uko ita karkanako chalaienggipa manderang rim·angaha ine ja·mano uamang koborko man·soaha ineba Hossain, FIR-o parakataha.
“Chingni general secretary-ko ita karkana chalaienggipa dolsa manderang chadrapenba, uamangni kosako badi ka·aniko ra·pilchina uko ka·mikkenataha indiba ua badi ka·aniko ra·pilna jechakon, uamang uko rim·gittangangaha,” ine ACFI-ni dilgipa parakataha.
Iani bidingo ACFI, Hallidayganj police station-o mokordoma ka·aha indiba da·o dipet uamang darangkoba biming mingjaha.
Indake ong·engon, ACFI-ni FIR-ko man·soaha aro iani bidingo police-rang am·sandianirangko dakna a·bachengataha ine West Garo Hills a·jani Superintendent of Police (SP) Abraham T Sangma parakataha.
