Me·chikrangko mangrakbatatna nangengani gimin agananga
TURA: Mongolbar salo, a·songni President Droupadi Murmu, dingtang dingtang self help group (SHG)-ni membor-rang baksa Jengjal-ni Baljek Airport-o tom·aha aro ia tom·anio ua, New Integrated Administration Complex-ko rikna gitaba pangchakaniko songe on·angjolaha.
Ia tom·anio bakko ra·anggipa gipin manderangara, a·dokni Governor Phagu Chauhan, Chief Minister Conrad K Sangma, Power Minister AT Mondal, Education Minister Rakkam A Sangma aro gipinrang ong·a.
Ia tom·anio a·songni President, jinmana aganprakangengon, me·chikrangko tangka paisani gita mangrakbatatna nangengani gimin aganangaha.
“Anga bang·en SHG-ni me·chikrang baksa agangrikaha aro uamang an·tangtang tangka paisa kamaina man·ahaosa kusi ong·bata ine anga nikna man·aha. Da·alo ia tom·anio bakko ra·enggipa me·chikrangoba anga apsan daken ka·donganirangko nikna man·enga. Me·chikrang tangka paisani gita mangrakahaosa ka·donganikoba man·batronga,” ine President Murmu aganaha.
Skang somoirangode iandakgipa jinma tom·anirango me·chikrang bang·e bak ra·rongjachim indiba da·alo India a·song re·mikkangengaha aro India a·songni dal·roroenganio me·chikrangba bak ong·engaha ineba ua aganaha.
Conrad Sangma-chi dilenggipa sorkarini kamrangko mittelpile aganangengon, Meghalaya a·doko donggipa dingtang dingtang SHG-rangni gimin janapangenba, ‘Lakhpati Didi’ gita dakgipa programrangchi me·chikrangni bading chiwalanirangko tang·doate songadam nokadamrango manderangni janggi tangani gadangko tang·doatna man·a ine President aganaha.
“Sorkarini on·enggipa pilak cholrangkon manderang ra·na nangchongmota. Me·chikrang SHG-rango ku·cholsan kamrangko ka·e an·tangtangko bilakatna man·a aro sorkari, bank aro uandakgiparangni tangka paisani gita dakchakanirangko ra·na man·a,” ine ua aganaha.
India a·songo me·chikrangba pilak kamrangon niksenggiparang aro mingsing minggamako man·pagiparang ong·na man·engaha ine janapatengon, me·chikrang an·tangtangni kamrango chu·sokgipa ong·na gita bang·gija ka·dongatani kattarang aro didianikosan nangaia ine President Murmu aganaha.
“2047 bilsini gisepo India a·songko pilakni gitan chu·gimik tang·dogipa a·song ong·atna niksamsoaniko chu·sokatna gitade, me·chikrangko pilakni gitan bilakbatatchengna nangenga,” ine President aganaha.
Ia tom·anio a·dokni Chief Minister Conrad K Sangma-ba jinmana aganprakangengon, Meghalaya a·dokona re·baahani gimin a·songni President-ko mittelpilangenba, a·dok sorkarini SHG-rangko tang·doatna kam ka·enggipani bidingo janapangaha.
“2018 bilsio chingni sorkariko jako ra·chengani somoio Meghalaya a·doko dol 4600-na baten self help group-rang komibatachim indiba bilsi bonga ba dokni gisepon chinga SHG-rangko da·o dol 45,000-mang ong·na sipile bikotatna man·aha. Ia sorkari scheme-mangmangchi namroro silroroaniko ra·baaniode bebera·ja indiba a·doko songdongenggipa chadamberang, me·chikrang aro game ge·e cha·enggiparangna dangdike on·anichi namdapataniosa bebera·a,” ine Sangma aganaha.