SHILLONG: Sukrobar salo Meghalaya sorkari, Hynniewtrep National Liberation Council (HNLC) bobil dolko tom·tomanina agangrikaniko dakangkuna gita okamatpiltaiaha.
Tom·tomaniona re·ba-pilna gita ma·mong aro a·dok sorkari baksa agan-grikaniko HNLC bobil dol ra·pilahachim ine nikna man·a.
Iani bidingo kobor ra·-timgipa manderang baksa agangrikengon, HNLC bobil dolni dal·batgipa dilgiparang baksa a·dok sorkari, je biapoba agan-grikna kusi ong·aiengachim ine a·dokni Deputy Chief Minister Prestone Tynsong parakataha.
HNLC bobil dolko tom·-tomaona rimbapilna gita NPP-chi dilenggipa MDA sorkari, dolgittamni gisepo agangrikaniko chu·sokatna nangnikenga ineba Tynsong aganaha.
“Ian da·ode HNLC-ni dilgiparangosa pangcha-kaiaha maina iandakgipa namgipa cholko uamang man·taijawaha. HNLC bobil dolni sorkari baksa agan-grikaniko ra·pilna seatgipa chittiko chinga sorkarini gita man·soaha indiba ia agangrikaniko dakangkuna gita chinga uamangna do·gako oe donengkua,” ine ua aganaha.
Sorkari baksa agangrikna gita HNLC-ni watatgipa dilgiparangde mamingkon ja·ku de·na man·jaengani gimin HNLC bobil dolni dal·batgipa dilgiparangsa ia agangrikanio bakko ra·na nangenga ineba Deputy CM gisik ra·attaianiko on·angaha.
“HNLC bobil dol baksa agangrikanirang namen ong·aiengachim indiba uamangni agangrikaniko dontongna seatgipa chittiko man·soon a·dok aro ma·mong sorkari dolgnian aiao inmanaha,” ine Tynsong aganaha.
HNLC bobil dolni dabianirangko knachakjaenga ine ma·mong aro a·dok sorkariko matnanganiara HNLC-ni dal·bea gualani ong·enga ineba Deputy Chief Minister parakataha.