SHILLONG: Shillong aro Tura medical college-ko Public Private Partnership (PPP) mode-o chalaina gita a·dokni Health department, a·dok sorkarina ku·pattianiko on·angaha.
Shillong medical college-na chamsoenggipa korosara gong kror 100 aro Tura medical college-na chamsoenggipa korosara gong kror 287.47 ong·engachim. USTM-o kulina sienggipa PA Sangma International Medical College-na a·dok sorkari gong kror 235-ko koros ka·skana siengachim.
Indake ong·engon, Shillong medical college-ko a·dok sorkari, Shillong Civil Hospital aro Ganesh Das Hospital-rango chalaina miksongenga ine kobor on·aha.
Health department-ni ku·pattianiko on·ani gitade, Shillong medical college-ni Obstetrics & Gynaecology baksana Paediatrics department-rangko Ganesh Das Hospital-o ma·chakenba, gipin department-rang baksana medical college-cum-hospital-ko Shillong Civil Hospital-o dakskana miksongengachim.
Shillong medical college-ko a·dok sorkari, North-Eastern Hill University (NEHU)-ni bak ong·atnaba miksongengachim.
Shillong medical college-ko kuliani bidingo kobor ra·timgiparangna talate on·angengon, ia college-ni skanggipa MBBS batch-ko 2025 bilsini gisepon admit ka·na miksongenga aro skanggipa batch-o sak 50 chatro chatrirangko ra·na miksongenga ine a·dokni Health Minister Ampareen Lyngdoh parakataha.
Shillong medical college-na sorkari, gong lak 5.90-ni processing fee-ko National Medical Commission-na gamanaha ineba Health Minister parakataha.
Tura medical college-ni bidingo janapatskaengon, adita salrangna skang Meghalaya Day-ko manianio uni Tura-ona re·baani somoio ua Tura medical college-ko ta·rake nipilangna man·aha ine Lyngdoh parakataha.
Tura medical college-ko rikanio matchotna nangenggipa adita kamrang dongkuenga ineba ua aganaha.
“Tura medical college-ona dakanggipa ramani bidingo bang·gija neng·nikanirang dongkuengani gimin PWD (Roads) baksa chanchirimna nangani dongkuenga,” ine Lyngdoh aganaha.
Tura medical college-ko rikani kamrang 60 percent-ni gita matchotmanaha ine janapatengon, ia kamrangko sorkari, re·baenggipa bilsini bon·angachibara matchotatna nisanko donenga ine Health Minister parakataha.