SHILLONG: Meghalaya a·doko bakan Common University Entrance Test (CUET) centre damgittamko kulina siengaha ine a·dokni Education Minister Rakkam A Sangma parakataha.
Education Minister-ni parakatani gitade, ia damgittam CUET centre-rangoni damgniko Shillong-o aro damsakode Tura-o kulina sienga.
“Adita salrangna skangsan anga, New Delhi National Testing Agency (NTA)-ni Director General baksa phone-chi agangrikataha aro ua post graduate course baksana CUET centre damgittamko Meghalaya a·dokna on·atenga ine u·iataha. Ia CUET centre damgittamoni damgniko Shillong-o aro damsakode Tura-o kuligen,” ine Sangma aganaha.
Chatro chatrirangni biming segatanio pangchake sorkari, mikkangchi centre-rangko kulidapangkunaba gnang ineba ua aganaha.
Meghalaya a·doko CUET porikkako seenggipa chatro chatrirang neng·nikanirangko chagrongna nangtokengoba a·dok sorkari, chatro chatrirangni neng·nikanirangko namatna gita maming ja·kurangkon de·jaenga ine Voice of the People’s Party (VPP) matnangani ja·man Education Minister, iako parakataha.
Iani bidingo nambate talate on·na man·na gita VPP-ni dilgiparangko ua an·tangona re·bae grongechina gitaba okamataha.
“Ian mitam politician-rangni chalakki dakanisan ong·aiakon maina maiba kam chu·sokna siengaha ine nikode uamang, an·tangtangsa bimingko man·na gita iani bidingo ku·rang on·na a·bachengronga,” ine Sangma aganaha.
Chatro chatrirangni neng·nikanirangko sorkari ma·sichaken, nanga gita dakchakanirangko on·na jotton ka·enga ineba ua talataniko on·angaha.
CUET aro gipin porikkarango Meghalaya a·dokni chatro chatrirang name dakna man·jaenga ineba a·dokni Education Minister, suk ong·gijaniko parakataha.
Nanggenchim ong·ode mikkangchi a·dok sorkari, coaching centre-rangko kuliani bidingo chanchianggen indiba da·o dipet chatro chatrirangko iandakgipa porikkarangna tarisamsona gita college-rangon chu·onga gita cholrang donga ineba Sangma parakataha.